जन्ती सवार टिपर दुर्घटनामा दुईको मृत्यु, २४ घाइते, बेहुला–बेहुली सुरक्षित
हाम्रा कुरा
प्रकाशित २०७८ फागुन ३० सोमबार
1.3k
Shares
उदयपुर । मदन भण्डारी लोकमार्गमा बिवाहको जन्ती सवार टिपर दुर्घटना हुँदा दुई जनाको मृत्यु भएको छ । दुर्घघटनामा २४ जना जन्ती घाइते भएका छन् ।
दुर्घटनामा उदयपुरको कटारी नगरपालिका वडा नम्बर २ का १९ वर्षीय दीपेन्द्र कुमाल र २४ वर्षीय अजय दनुवारको मृत्यु भएको हो । जन्ती बोकेको टिपर सिन्धुलीको दुधौली नगरपालिका– ५ सिथौली र खनिया खण्डको तेश्रो पुलमा पल्टिँदा उनीहरुको मृत्यु भएको हो । अन्य २४ जना जन्ती घाइते भएका छन् ।
मृत्यु हुने तथा घाइते सबै उदयपुरको कटारी नगरपालिकाको रहेको जिल्ला प्रहरी कार्यालय उदयपुरका प्रहरी प्रवक्ता प्रहरी नायब उपरीक्षक बेदप्रसाद गौतमले जानकारी दिए ।
जन्ती बोकेको ना ३ ख ७४९० नम्बरको टिपर दुर्घटना भएको हो । दुधौलीका ट्राफिक प्रहरी कार्यालयका अनुसार टिपरमा सवार अधिकांश कटारी नगरपालिका वडा नम्बर २ का स्थानीयवासी हुन् । उनीहरुको कटारी अस्पतालमा उपचार भइरहेको छ ।
गौतमले छिमेकी जिल्ला सिन्धुलीको बाणेगाउँबाट बेहुला बेहुली लिएर कटारीतर्फ आउँदै गरेको टिपर दुर्घटनामा परेको बताए । घटनामा टिपरभित्र सवार २४ जना जन्ती घाइते भएका छन । उनीहरुमध्ये ४ जनाको अवस्था गम्भीर छ ।
चारै जनालाई थप उपचारका लागि काठमाडौं रेफर गरिएको छ । अन्यको विराटनगर, कटारी र जिल्ला अस्पताल सिन्धुलीमा उपचार भइरहेको छ । जन्तीलाई टिपरमा पठाएर बेहुला बेहुली भने अर्कै गाडीमा आएका थिए । टिपर चालक हाल प्रहरीको नियन्त्रणमा छन् ।
