- सुन चाँदी दर
- विनिमय दर
- नेपाली पात्रो
- राशिफल
दार्चुला । दार्चुलामा प्रमुख जनस्वास्थ्यको समस्याका रूपमा रहेको टाइफाइड विरुद्ध खोप अभियान सञ्चालन गरिने भएको छ । बहु वर्षीय खोप कार्य योजना सन् २०१७-२१ को लक्ष्यअनुरूप यही चैत २५ देखि ३० गतेसम्म खोप कार्यक्रम सञ्चालन हुने जिल्ला स्वास्थ्य कार्यालय दार्चुलाले जनाएको छ ।
यही चैत २५ गतेदेखि देशैभर सुरु हुन गइरहेको खोप अभियान कार्यक्रमअन्तर्गत जिल्लाका ३६ हजार ९ सय ४० बालबालिकालाई टाइफाइडविरुद्धको खोप दिइने स्वास्थ्य कार्यालय दार्चुलाका प्रमुख जयराज भट्टले जानकारी दिए ।
टाइफाइडविरुद्धको खोप १५ महिनादेखि १५ वर्ष उमेरसम्मका बालबालिकालाई जिल्लाका सम्पूर्ण विद्यालय तथा स्वास्थ्य संस्थामा लगाउन लागिएको उनले बताए । यो खोपको भायलमा भिभिएम रहेको तथा एक भायलमा पाँच मात्रा रहेको रङविहीन तयारी झोलको रूपमा एक जनालाई शून्य दशमलव पाँच एमएलमा दिइने उनको भनाइ छ । यो खोप ९६ दशमलव ९० प्रतिशत प्रभावकारी मानिएको छ ।
प्रमुख भट्टका अनुसार खोप अभियानका लागि १ सय ४३ स्वास्थ्यकर्मीलाई तालिम दिइएको छ । यो खोप १५ महिनादेखि २३ महिनाको बच्चालाई बायाँ तिघ्राको बीच बाहिरी भाग र २ वर्षदेखि १५ वर्षसम्मका बालबालिकालाई बायाँ पाखुराको बीच बाहिरी भागमा लगाइने छ ।
अभियानको माध्यमबाट १५ महिनादेखि १५ वर्षमुनिका सबै बालबालिकालाई टाइफाइडविरुद्धको खोप प्रदान गर्ने र त्यसपछि नियमित खोपमा यो खोप समावेश गरी १५ महिनाको उमेरमा १ मात्रा खोप निरन्तर उपलब्ध गराउने लक्ष्य राखिएको छ ।
दार्चुलामा ५ दिनको अभियान सञ्चालन गरेर खोप दिइसक्ने लक्ष्य रहेको स्वास्थ्य कार्यालय दार्चुलाले जनाएको छ । ४ सय २१ ओटा खोप केन्द्र कायम गरिएकोमा ८० प्रतिशत केन्द्र विद्यालयमा रहेका छन् ।