शनिवार र आइतबार बिदा दिने निर्णयको पोखराका पर्यटन व्यवसायीले गरे स्वागत

हाम्रा कुरा

प्रकाशित २०७९ वैशाख १६ शुक्रबार

पोखरा। पोखराका पर्यटन व्यवसायीले हप्तामा दुई दिन बिदा दिने सरकारी निर्णयको स्वागत गरेका छन्। सरकारी निर्णयले पर्यटनमा सकारात्मक सन्देश दिएको व्यवसायीहरूको बुझाइ छ।

कोरोना सङ्क्रमणका कारण थलिएको पर्यटनमा शनिवार र आइतबार बिदाको निर्णयले आन्तरिक पर्यटक बढ्ने उनीहरूको विश्वास छ। सरकारले आगामी १ जेठबाट लागू हुने गरी हप्तामा दुई दिन (शनिवार र आइतबार) सार्वजनिक बिदा दिने निर्णय गरेको हो।

होटेल सङ्घले विज्ञप्ति नै निकालेर सरकारको निर्णयले सकारात्मक सन्देश दिएको बताएको छ। ‘पर्यटन क्षेत्र लामो समयदेखि विविध समस्याबाट प्रताडित हुँदै आएकोमा दुई दिने बिदाको व्यवस्थाले केही रूपमा भए पनि व्यवसायमा राहत पुग्ने विश्वास हामीले लिएका छौँ,’ विज्ञप्तिमा भनिएको छ।

कोभिडको महामारीबाट सबैभन्दा बढी प्रभावित पर्यटन क्षेत्र नै हुन पुगेको र दुई दिने बिदाको व्यवस्थाले कोरोनाबाट थलिएको पर्यटन क्षेत्रलाई केही रूपमा भए पनि चलायमान बनाउन र आर्थिक गतिविधि बढाउन थप मद्दत पुग्ने विश्वास सङ्घको रहेको अध्यक्ष लक्ष्मण सुवेदीले बताए।

पोखरा पर्यटन परिषद्का अध्यक्ष गोपीबहादुर भट्टराईले दुई दिन बिदा पर्यटनका लागि सुखद समाचार रहेको बताउँछन्। अरू देशमा पनि यस्तो अभ्यास रहेकोमा नेपालले ढिलो गरी यसलाई पछ्याएको उनी बताउँछन्। यो निर्णयले कर्मचारीमा आफूसँगै पारिवारिक घुमघाम गर्ने अवसरसमेत प्रदान गर्ने उनले बताए।

पोखरामा हिजोआज विदेशीभन्दा आन्तरिक पर्यटक बढी आउँछन्। बिस्तारै नेपालीमा घुम्ने संस्कारको विकास भएको छ। पोखराका होटेलमा ४० हजारभन्दा बढी बेड छन्। तीमध्ये अहिले आधाभन्दा बढी भरिएका छन्।

पर्यटकलाई भुलाउनकै लागि सरकारले लेकसाइडलाई २४ सै घण्टा खुला राख्ने निर्णय गरेको छ। अहिले व्यवसायीहरूले लगानी बढाएका छन् भने साहसिक खेलकुदका गतिविधि थपिएको छ।