काठमाडौं । झापामा तीन जना मिल्ने साथीहरूसँगै झुण्डिएको घटनाको विस्तृत विवरण आइसकेको छैन । प्रहरीले तीनै जनाको शवलाई पोस्टमार्टमका लागि धरान घोपा पठाइएको छ तर रिपोर्ट आउने क्रममा छ । प्रारम्भिक छानबिनका क्रममा उनीहरूले आत्महत्या गरेको हुनसक्ने आशङ्का गरिए पनि कारण खुल्न सकेको छैन ।
कचनकवल गाउँपालिका-५ स्थित पाठामारीको बेल्लेगाउँस्थित सुनकोसी चिया बगानको बयरको रुखमा दुई जना एउटै हाँगामा र अर्की किशोरी अर्को हाँगामा झुण्डिएको अवस्थामा आइतबार बिहान फेला परेका थिए ।
मृत भेटिएका १६ वर्षीया करिना गणेश, कल्पना गणेश र १७ वर्षीया अञ्जली गणेश मिल्ने साथी थिए । ज्यादै अप्ठेरो ठाउँमा उनीहरूको शव भेटिएकाले कसरी त्यहाँ उनीहरू झुन्डिए होलान् भन्ने आशङ्का उत्पन्न भएको छ । उनीहरू सोही चिया बगानमा मजदुरी गर्दै आएका थिए । घटनास्थल नेपाल-भारत सीमा क्षेत्रमा पर्छ।
झापाका प्रहरी प्रवक्ता वसन्त पाठकका अनुसार दुई जनाको गोजीमा मोबाइल फेला परेको छ । दुबै मोबाइलमा ‘प्याट्रोन लक’ रहेको र मोबाइल जाँचका लागि डिजिटल फोरेन्सिक ल्याबमा पठाइको छ । उनका अनुसार तीनमध्ये एक किशोरीको फोनमा केही समयअघि भारतीय नम्बरमा सम्पर्क भएको देखिएको छ ।
उनले हत्या भएको दाबी गर्ने कुनै आधार नभएको बताए । पोस्टमार्टम रिपोर्ट आएपछि धेरै कुरा खुल्ने बताए । आइतबार नै तीनै जनाको अन्त्येष्टि भएको परिवारले जनाएको छ ।
स्थानीय बासिन्दाले भने घटना हत्या भएको बताएका छन् । सीमावर्ती क्षेत्रमा भएको यो घटनामा भारतीयहरूको संलग्नता पनि हुन सक्ने आशङ्का छ । सो घटनालाई लिएर प्रहरी सूक्ष्म ढङ्गबाट अनुसन्धान गरिरहेको छ । तीनै जनाको शवमा कुनै चोटपटक नदेखिएको प्रहरीको भनाइ छ ।
