गठबन्धनभन्दा पार्टी सुदृढ गर्न देउवालाई शेखर कोइरालाको आग्रह
हाम्रा कुरा
प्रकाशित २०७९ साउन ३० सोमबार
1.6k
Shares
काठमाडौं । नेपाली कांग्रेसका सभापति शेरबहादुर देउवाले बोलाएपछि प्रधानमन्त्रीको सरकारी निवास बालुवाटार पुगेका नेता डा. शेखर कोइरालाले पार्टीभित्रको असन्तुष्टि व्यवस्थापन गर्न सुझाव दिएका छन् ।
पार्टीभित्रको असन्तुष्टि व्यवस्थापन नगरी गठबन्धनमा मात्रै जोड दिँदा परिणाम राम्रो नआउने भन्दै कांग्रेस डा. कोइरालाले सुझाव दिएका हुन् ।
आइतबार प्रधानमन्त्री देउवाले बालुवाटारमा बोलाएपछि उनीसँग छलफल गर्नका लागि डा. कोइराला अपराह्न ३ बजे बालुवाटार पुगेका थिए । भेटमा कोइरालाले भ्रातृ संस्थाका अध्यक्ष , केन्द्रीय कार्यसमितिका सदस्य मनोनयनमा एकलौटी गरेको बताएका छन् ।
देउवासँग एक घण्टा कुराकानी गरेका डा. कोइरालाले एकलौटी ढङ्गले अघि बढे गठबन्धन मात्रै गरेर कुनै लाभ नहुने र देशभरका कार्यकर्तामा असन्तुष्टि रहेको सुनाएका थिए ।
यता सभापति देउवाले हालसम्म भएका निर्णय स्वीकार गर्न आग्रह गरेका थिए । उनले भविष्यमा परामर्श गरेर अघि बढ्ने आश्वासन दिएका थिए ।
