जनकपुरधाम। मधेस प्रदेशको राजधानी जनकपुरधाममा ‘यु–१६ विद्यालय स्तरीय क्रिकेट च्याम्पियनसिप २०७९’ हुने भएको छ । हरिज स्पोर्टस जोनको आयोजनामा स्थानीय रंगभूमी मैदान ब्राहबिघामा माघ १५ गतेदेखि उक्त प्रतियोगिता हुने भएको हो ।
जनकपुरधाममा शुक्रबार पत्रकार सम्मेलनको आयोजना गरि राष्ट्रिय क्रिकेट टिमका खेलाडीसमेत रहेका मधेस प्रदेश क्रिकेट टिमका कप्तान हरिशंकर साहले प्रतियोगितामा जनकपुरधामका निजी तथा सामुदायिक विद्यालयहरूको सहभागिता रहने बताए ।
बालबालिकालाई खेलप्रति रुचि जगाउन र मानसिक तथा शारीरिक रूपमा मजबुत बनाउने उद्देश्यका साथै प्रतियोगिता आयोजना गर्न लागिएको पत्रकार सम्मेलनमा जानकारी गराए।
लिगको आधारमा हुने प्रतियोगिताहरूमा जनकपुरधाम तथा आसपासका विद्यालयहरूले भाग लिने साहले बताए ।
प्रतियोगितामा पहिले आउने १६ वटा टिमलाई सहभागी गराइने र त्यसभन्दा बढी सङ्ख्या भए क्वालिफाईङ्ग प्रोसेसको आधारमा छनोट गरिने साहले पत्रकार सम्मेलनमा बताए ।
भोलिको दिनमा क्रिकेट खेलमा बालबालिकालाई अवसरलाई प्रदान गर्नु पनि यस प्रतियोगिताको मुख्य उद्देश्य रहेको साहको तर्क थियो । प्रतियोगिताको विजेताले आकर्षक ट्रफि, मेडल र प्रमाणपत्रहरू प्राप्त गर्नेछन् ।
