काठमाडौं । एसिया कप क्रिकेट पाकिस्तान भन्दा बाहिर हुने भएको छ । एसियाली क्रिकेट परिषद् (एसीसी) ले एसिया कप पाकिस्तान बाहिर गर्ने निर्णय गरेको हो ।
मिडिया रिपोर्टअनुसार पाकिस्तान क्रिकेट बोर्ड (पीसीबी) ले प्रतियोगिता हाइब्रिड मोडलमा खेलाउन गरेको प्रस्ताव अन्य सदस्य देशहरुले खारेज गरेसँगै एसिया कप पाकिस्तान भन्दा बाहिर हुन लागेको हो ।
उक्त हाइब्रिड मोडल भनेको भारतका खेल सबै अन्य देशमा खेलाउने । यद्यपि अझै एसीसीले यो प्रतियोगिता पाकिस्तान भन्दा बाहिर गर्ने औपचारिक घोषणा भने गरेको छैन ।
अब यो प्रतियोगिता श्रीलंकामा हुन सक्ने सम्भावना रहेको छ ।
यो प्रतियोगिता पाकिस्तानमा सेप्टेम्बर २ देखि १७ सम्म हुने कार्यतालिका रहेको थियो ।
पाकिस्तानमा प्रतियोगिता आयोजना भनेसँगै भारतीय क्रिकेट कन्ट्रोल बोर्ड बीसीसीआईले पाकिस्तानमा खेल्न अस्वीकार गर्दै तटस्थ मैदानमा खेल्न आग्रह गरेको थियो ।
अहिले भने पाकिस्तानले भारतमा आयोजना हुँदै गरेको विश्वकप नखेल्ने धम्की दिँदै आएको छ ।
भारतले पाकिस्तानमा एसिया कप नखेल्ने हो भने पाकिस्तान पनि भारतमा विश्वकप खेल्न नआउने धम्की दिएको हो ।
पाकिस्तानले आफ्ना खेल भारत बाहिर गर्न पनि भनेको छ ।
एसिया कपमा अहिलेसम्म भारतले ७ पटक, श्रीलंकाले ५ पटक र पाकिस्तानले २ पटक उपाधि जितेको छ ।
नेपालले पहिलो पटक एसिया कप खेल्दैछ । एसिया कपमा भारत, पाकिस्तान, श्रीलंका, अफगानिस्तान र बंगलादेशसँगै नेपालले खेल्नेछन् ।
नेपालको समूहमा भारत र पाकिस्तान रहेका छन् । अर्को समूहमा श्रीलंका, अफगानिस्तान र बंगलादेश छन् ।
