काठमाडौं । नक्कली भुटानी शरणार्थी प्रकरणमा नेपाली कांग्रेसका केन्द्रीय सदस्य एवं पूर्व गृहमन्त्री बालकृष्ण खाँड पक्राउ परेका छन्।
प्रहरीले अनुसन्धानको लागि भन्दै पूर्व गृहमन्त्री खाँड र उनका निजी सचिव नरेन्द्र केसीलाई बुधबार बिहान निवासबाटै पक्राउ गरेको हो ।
आफ्नै निवास मैजुबहालबाट पक्राउ परेका पूर्व गृहमन्त्री खाँडलाई महानगरीय प्रहरी परिसर, टेकु लगिएको छ ।
खाँड गृहमन्त्री हुँदा गृह सचिव रहेका टेकनारायण पाण्डेले खाँणको नाम पनि लिएपछि उनी पक्राउ परेका हुन् ।
पाण्डेलाई खाँडले रोजेर गृह सचिव बनाएका थिए । अहिले उनीसहित दश जना हिरासतमा रहेका छन् ।
यसअघि पक्राउ परेकामा तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राईसहित बहालवाला सचिव (तत्कालीन गृह सचिव) टेकनारायण पाण्डे, सन्दीप रायमाझी, केशव दुलाल, सानु भण्डारी, टङ्क गुरुङ, सन्देश शर्मा पोखरेल र सागर थुलुङ छन् ।
खाँडकी श्रीमती मञ्जु खाँड र कांग्रेस नेतृ आरजु राणालाई रकम बुझाउनुपर्ने भन्दै बिचौलियासँगको अडियो संवादसमेत यसअघि सार्वजनिक भइसकेको छ ।
शरणार्थी प्रकरणमा समातिएका अभियुक्तहरूले खाँडकी श्रीमती मञ्जुलाई ६ करोड रुपैयाँ बुझाएको पोलेका छन् ।
खाँडले यसअघि विज्ञप्ति जारी गर्दै नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा आफ्नो कुनै संलग्नता नरहेको र आफूमाथि भ्रामक समाचार आइरहेको भन्दै त्यसको खण्डन गरेका थिए । त्यस्तै प्रहरीलाई सघाउने बताएका थिए ।
यता एक साताअघि पक्राउ पूर्जी जारी गरिएका नेकपा एमालेका सचिव टोपबहादुर रायमाझी फरार रहेका छन् ।
