राप्ती नदीको बाढीमा फसेका छ गोठालासहित ७८ बाख्राको उद्दार

सौरभ गिरी,

प्रकाशित २०८० असार १७ आइतबार

नेपालगञ्ज । बाँकेको राप्ती नदीमा बाढी आएसँगै थप जोखिम बढ्दै गएको छ। नदी बढेसँगै गएराति राप्तीसोनारी वडा नं २ शम्शेरगन्जस्थित राप्ती नदीको बीचको टापु जंगलमा फसेकाहरुलाई सकुशल उद्दार गरिएको छ ।

राप्ती सोनारी गाउँपालिकाको शम्शेरगन्जस्थित राप्ती नदीको बीचको टापु जंगलमा बाख्रा गोठाला गएका छ जना गोठालाहरु र ७८ वटा बाख्रा शनिबार साँझ ५ बजेदेखि फसेको सूचना पाए लगत्तै प्रमुख जिल्ला अधिकारी विपिन आचार्यको नेतृत्वमा गएको बाँके राष्ट्रिय निकुञ्जको सुरक्षार्थ खटिएको नेपाली सेना , नेपाल प्रहरी , शम्शेरगन्जस्थित सशस्त्र प्रहरीको विशेष उद्दार टोलीले टापुमा फसेका ६ जना र ७८ वटा बाख्रालाई सकुशल उद्दार गरेको इलाका प्रहरी कार्यालय कोहलपुरले जनाएको छ ।

उनीहरुको उद्दार कार्यमा सुरक्षा फौजसहित जनप्रतिनिधि, राजनीतिक दलका प्रतिनिधिसहित स्थानीयवासीसमेत खटिएका थिए । उद्दार कार्यमा खटिएका बाँके कांग्रेसका प्रवक्ता डिल्ली गिरीले सुरक्षा निकायको सर्हानीय कार्यलाई धन्यवाद दिएका छन् ।