काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेको टिमबाट पैसा उठाउने गरेको पोलेका पूर्व सांसद डा. ढाकाकुमार श्रेष्ठको आरोप माथि छानबिन भइरहेको प्रमुख सचेतक सन्तोष परियारले बताएका छन् ।
सांसद पद खुस्किएपछि पूर्व सांसद श्रेष्ठले सभापति रवि लामिछानेको टिमबाट पैसा उठाउने गरेका पोलेका थिए । आफूलाई मन्त्री बनाउनका लागि भन्दै केन्द्रीय सदस्य मोहनजंग थापाले तीन करोड रुपैयाँ रकम मागेको बताएका थिए ।
परियारले पूर्व सांसद डा. श्रेष्ठसँग पैसा मागेको आरोप लागेका पार्टीका केन्द्रीय सदस्य मोहनजंग थापामाथि छानबिन भइरहेको बताएका हुन् । उनले आरोप प्रमाणित भए थापालाई पनि कारबाही गरिने बताए । उनले छानबिन प्रक्रियालाई पनि छिट्टै टुङ्ग्याउने बताए ।
समानुपातिकबाट सांसद बनेका श्रेष्ठले मेडिकल व्यवसायी दुर्गा प्रसाईँसँग दुई करोड रुपैयाँ रकम मागेको अडियो सार्वजनिक भएको थियो । सोही अडियोका कारण उनलाई पार्टीले साधारण सदस्यसमेत नरहने गरी कारबाही गरेको थियो । त्यसपछि उनको सांसद पद पनि खुस्किएको थियो ।
