निराहार रहेर छातीमा दशैँको जमरा उमार्दै पाथीभराका मूल पुजारी

युवराज रेग्मी,

प्रकाशित २०८० कार्तिक २ बिहिबार

झापा । झापाको गौरीगञ्ज गाउँपालिका वडा नं २ वीरपुरस्थित ठूली पाथीभरा मन्दिरका मूल पुजारी प्रह्लाद सापकोटा निराहार व्रत बसी आफ्नो छातीमा दशैँको जमरा उमार्दैछ्न् ।

उक्त अवसरमा मन्दिरमा दैनिक पूजापाठ हुने गरेको र सापकोटाको छातीमा उम्रिएको जमरा हेर्न अहिले भक्तजनहरुको घुइँचो लाग्न थालेको मन्दिर ब्यवस्थापन समितिले जनाएको छ ।

असोज २८ गते बिहान पूजापाठ गरेर मन्दिरका मूल पुजारी सापकोटा मन्दिर परिसरमा दशैँको लागि आफ्नो छातीमा जमरा उमार्नकै लागि सुतेका छन् ।

जमरा राख्नुभन्दा दुई दिन अघिदेखि पानी र अन्नसमेत नखाइ सापकोटा निराहार व्रतमा रहेको र आफूलाई पाथिभरा माताले उक्त जमरा उमार्न लगाएको उनको भनाइ रहेको स्थानीयले बताए ।

निराहार ब्रत बसी यसरी जमरा उमार्दा आफूलाई कुनै शारीरिक कष्ट नभएको सापकोटाले बताए । साथै उनले आफूलाई पाथीभरा भगवतीको भक्त ‘माता गुरु’ बताउँदै आएका छन् ।

अघिल्ला वर्षहरुमा फलाहार खाएर यसरी नै आफ्नो छातीमा जमरा उमार्ने गरेका सापकोटा यसपटक भने निराहार व्रत बसेर जमारा उमार्ने कठोर कार्यमा लागेका हुन् ।

उनले महानवमीका दिन एक लाख दीप प्रज्ज्वलन गराइ आफ्नो व्रत समापन गर्ने जनाएका छ्न् ।

दशैँको महानवमीका दिनसम्म दुर्गा भवानीको विधिपूर्वक पूजा गरेर छातीमा राखिएको जमरालाई प्रसादका रुपमा सर्वसाधारणलाई दिइने मन्दिर व्यवस्थापन समितिले जनाएको छ ।