मुगु । चिसो छल्न रारा आएका पाहुना चराहरुको गणना गरिएको छ । रारा राष्ट्रिय निकुञ्जको कार्यालय मुगुले सोमबार नेपालकै ठूलो ताल रारामा चिसो छल्न आएका पाहुना चराहरुको गणना गरेको हो ।
गणना कार्यमा निकुञ्जका कर्मचारी,नेपाली सेना, मध्यवर्ती समितिका पदाधिकारी र स्थानीयहरुको सहयोग सहभागिता रहेको थियो । चरा गणना गर्न निकुञ्जले ४ ओटा समूह बनाएर चराहरुको सधै बसोबास गर्ने र तैरिने तालका निश्चित ठाउँहरुमा खटाइ सोमबार बिहान ९ बजेदेखि ११ बजेसम्म गणना गरिएको रारा राष्ट्रिय निकुञ्ज कार्यालय मुगुका वरिष्ठ संरक्षण अधिकृत राजु घिमिरेले जानकारी गराए ।
चार ओटै टोलीले ल्याएका चराहरुको संख्या,प्रजातिहरुलाई छुटाउँदा यो मौसममा साइबेरिया,मानसरोवरबाट चिसो छल्न सोमबारसम्म कोम्मोन कोड(मरुल) १७८, टुप्टेड डक (कालिजुरे हाँस) ८१, खोया हाँस (३,हरियो टाउके हास १,सुनजुरे हाँस ११७ र सिउरी डुबुल्के हाँस १२ गरी कूल ३९२ पाहुना चरा रारा आएको पाइएको वरिष्ठ संरक्षण अधिकृत घिमिरेले बताए ।
घिमिरेकै अनुसार चिसो छ्ल्न सयौँ चराहरु कयौँ माइलको यात्रा गर्दै रारा आउने क्रममा कयौँ चराको समूहबाट छुटेर,बाटो बिराएर,थाकेर बाटोमै मृत्यु हुने गरेको र पुस,माघ महिनामा रारामा पुगेका पाहुना चराहरु ४/५ महिनाको रारा बसाइपछि फर्किन्छन् ।
चरा गणना २०१२ का अनुसार रारा राष्ट्रिय निकुञ्जमा २७२ प्रजातिका चराहरु पाइने यकिन गरिएको थियो भने यसमध्ये ४९ प्रजातिका चराहरु पानी चरा रहेका थिए ।
पुस र माघको चिसोमा रारा तालको पानी तातो हुने पर्याप्त आहारा पाइने भएकाले चराहरु रारा आउने गरेका हुन् । पाहुना चराहरु निकुञ्जको मिलीचौर, ठाकुरज्यू मन्दिर, ओखरबोट, निजार क्षेत्रमा खोयाहाँस, कपनकुट लगायतका चरा प्रशस्त देख्न सकिन्छ।
तालमा मिसिएका स-साना हिमखोलातिर पनि यी चराहरु उक्लिने गरेका छन् । चराहरु राति बास बस्न ताल नजिकका ढुङ्गेओढार, रुखमा आउने गरेका छन् ।
मंसिर शुरु भएपछि राराको तालदेखि जंगल क्षेत्रमा विभिन्न प्रकारका ठूला-साना चराचुरुङ्गी देखिनुका साथै चिरबिर चिरबिरको आवाज सुनिने गरेको मुर्मा गाउँका स्थानीय नन्दसिङ्ग रोकायाले बताए ।
प्रत्यक वर्ष विश्वका विभिन्न चिसो ठाउँहरुबाट चिसो छल्न रारामा विभिन्न प्रजातिका पाहुना चरा आउने गरेका छन् ।
कुन वर्ष कति पहुना चरा आए भनेर निकुञ्जले चराहरुको गणना गर्ने गर्दछ ।
