महेन्द्रनगर । नेपाली कांग्रेसका प्रमुख सचेतक रमेश लेखकले सुदूरपश्चिम रणनीतिक महत्वको भूगोल भएको बताएका छन् ।
महेन्द्रनगरमा महाकाली बहुप्राविधिक शिक्षालयको तेस्रो वार्षिकोत्सव समारोहमा कांग्रेस नेता लेखकले नेपाल-भारत र चीनबीचको त्रिदेशीय नाका निर्माणको काम क्रमिक रुपमा अघि बढेको बताए ।
“दोधारा-चादँनीमा सुक्खा बन्दरगाह निर्माणको शिलान्यास आगामी एक-दुई महिनामा हुन्छ”, उनले भने, “भारतले पनि सुक्खा बन्दरगाहसित जोड्ने काम गर्नेछ ।”
उहाँले महाकाली नदीमा चार ‘लेन’ को पक्की पुल बनिसकेको बताउँदै महाकाली ‘करिडोर’ को काम पनि प्रारम्भ भएको जानकारी दिए ।
“यो पटक कञ्चनपुर र डडेल्धुरा करिडोरबाट जोडिएर हामीले परशुराम धामको दर्शन गरिसकेका छौं”, नेता लेखकले भने, “अर्को पटक यही करिडोरबाट बैतडी र त्यसपछि दार्चुला पुग्ने गरी ट्रयाक खुलाउने काम हुन्छ ।”
उनले चीन र भारतसित नाका जोड्न सके तीन देशबीचको व्यापार बढ्ने विश्वास व्यक्त गरे ।
“ठूलो अर्थतन्त्र भएको मुलुक भारतमा सम्भावना बोकेका प्रान्तहरुबाट हामी सबै भन्दा नजिक छौं”, उनले भने, “चीनको पनि कैलाश मानसरोवर धार्मिकस्थल नजिक भएकाले हामीले दुवैतिर नाका खोल्नुपर्छ ।”
