काठमाडौँ । रेमिट्यान्स आप्रवाहको उत्साहपूर्ण अवस्था माघ महिनामा ब्रेक लागेको छ । नेपाल राष्ट्र बैंकले प्रकाशन गरेको आर्थिक वर्ष २०८०–८१ माघ महिनाको विवरणअनुसार माघ महिनासम्म ८ खर्ब ३९ अर्ब रुपैयाँ बराबरको रेमिट्यान्स नेपाल भित्रिएको छ । पुससम्म यो आकार ७ खर्ब ३३ अर्ब रुपैयाँ रहेको थियो । यस अनुसार माघ महिनामा रेमिट्यान्स १ खर्ब ६ अर्बमा झरेको हो ।

यसअघि पुसमा १ खर्ब २० अर्ब, मंसिरमा १ खर्ब ३५ अर्ब, कात्तिकमा १ खर्ब १२ अर्ब, असोजमा १ खर्ब ३७ अर्ब, भदौमा १ खर्ब १२ अर्ब र साउनमा १ खर्ब २८ अर्ब रेमिट्यान्स नेपाल भित्रिएको थियो । 

यद्यपि अघिल्लो वर्षको माघको तुलनामा भने यो सामान्य बढी हो । अघिल्लो वर्ष माघमा १ खर्ब ५ अर्ब रुपैयाँ रेमिट्यान्स भित्रिएको राष्ट्र बैंकको तथ्यांक छ । 

रेमिट्यान्स घटेसँगै नेपालको चालु खातामा देखिँदै आएको नाफासमेत यो महिनामा शून्यजस्तै देखिएको छ । अघिल्लो महिनासम्म १ खर्ब ६१ अर्ब ६२ करोड नाफामा रहेको चालु खाता यो महिना १ खर्ब ६१ अर्ब ६९ करोड पुगेको छ ।

अघिल्लो ६ महिनामा मासिक औसत २६ अर्बभन्दा बढी रहेको चालु खाता नाफा यो महिनामा ७ करोडमा झरेको हो । 

रेमिट्यान्सको यो अवस्थासँगै नेपालसँग माघ मसान्तसम्म रहेको सञ्चिति १३ खर्ब ८३ अर्ब रुपैयाँ पुगेको छ । यो सञ्चितिले १२.३ महिनाको वस्तु तथा सेवाको आयात धान्नसक्ने अवस्था रहेको राष्ट्र बैंकले जनाएको छ । अघिल्लो महिनासम्म १२.१ महिनासम्म धान्ने सञ्चिति कायम थियो । 

चालु खाता सन्तुलनको अवस्थामा पुगे पनि माघ महिनामा शोधनान्तर अवस्था भने यो महिना पनि करिब २४ अर्बले बढेर २ खर्ब ९७ अर्ब ७२ करोड रुपैयाँ पुगेको राष्ट्र बैंकले जनाएको छ । शोधनान्तर अवस्था देशमा भित्रिएको र बाहिरिएको कुल विदेशी मुद्राको अन्तर हो । 

यो अवधिमा उपभोक्त मुद्रास्फीति ५.१ प्रतिशत छ । सरकारले यसलाई ६.५ प्रतिशतमा सीमित गर्ने लक्ष्य राखेको थियो । यो अवधिमा भएको मूल्यवृद्धि सरकारी लक्ष्यभित्रै रहेको देखिएको छ । 

साउनको तुलनामा माघसम्म देशको विस्तृत मुद्राप्रदाय अर्थात् बैंकिङ क्षेत्रको निक्षेप तथा बजारमा प्रचलित नोटको आकार विस्तृत मुद्राप्रदाय ७ प्रतिशतले बढेको छ । अघिल्लो माघको तुलनामा यस्तो वृद्धिदर १३.१ प्रतिशत रहेको राष्ट्र बैंकले जनाएको छ । 

७ महिनाको यो अवधिमा पहिलोपटक श्रम स्वीकृति लिएर विदेश जाने तथा पुनः श्रम स्वीकृति लिनेको संख्या ह्वात्तै घटेको छ । 

यो अवधिमा वैदेशिक रोजगारीका लागि अन्तिम श्रम स्वीकृति लिनेको संख्या २ लाख ४७ हजार र पुनः श्रम स्वीकृति लिनेको संख्या १ लाख ५८ हजार रहेको छ ।

अघिल्लो वर्षको सोही अवधिमा यस्तो संख्या क्रमशः ३ लाख १४ हजार १ लाख ६७ हजार रहेको थियो ।