इलाम । इलाम क्षेत्र नम्बर २ को उपनिर्वाचनको मतगणनाको मतपरिणाम सार्वजनिक भएको छ । निर्वाचन आयोगको मतपरिणाम अनुसार एमालेका उम्मेदवार सुहाङ नेम्वाङ ५ हजार ८३० मतान्तरले विजयी भएका छन् ।
इलाम नगरपालिका ७ को गौतमबुद्ध सभाहल (सिटी हल) मा भएको मतगणनामा ६८ हजार ४७२ सदर मत गणना भएकामा एमालेका उम्मेदवार सुहाङ ले २७ हजार ७७२ मत प्राप्त गरि विजयी भए ।
उनका निकटतम प्रतिस्पर्धी नेपाली कांग्रेसका डम्बरबहादुर खड्काले २१ हजार ९४२ मत ल्याएका छन् ।
तेस्रो स्थानका मुढा चुनाव चिन्ह रहेका स्वतन्त्र उम्मेदवार डकेन्द्रसिंह थेगिमले ११ हजार ४५७ मत ल्याएका छन् । रास्वपाका मिलन लिम्बूले ५ हजार ५० मत ल्याए ।
शनिबार सकिएको मतदान निकै सुस्त गतिमा गणना हुँदा आज बिहान मात्र मतपरिणाम आएको हो । इलाम २ मा ५९.७९ प्रतिशत मतदान भएको थियो । यो क्षेत्रमा १ लाख १५ हजार ८८९ मतदाता थिए । मुख्य निर्वाचन अधिकृतको कार्यालयका अनुसार ६९ हजार ३७४ मत खसेको छ । निर्वाचनमा ९०२ मत बदर भएको छ ।
इलाम २ मा १२ राजनीतिक दलका र ७ स्वतन्त्र गरी १९ जना उम्मेदवार चुनावी प्रतिस्पर्धामा थिए । यो क्षेत्रमा यसअघि एमालेका उपाध्यक्ष सुवासचन्द्र नेम्वाङले जितेका थिए । अहिले पनि उनकै छोरा सुहाङले निर्वाचन जितेका छन् ।
यस्तो छ इलाम २ मा जमानत जफत हुनेहरुको मत
१९ जना उम्मेदवार भएमध्ये बाँकी सबैको जमानत जफत भएको छ । कुल मतदाता १ लाख १५ हजार ८८९ रहेकामा जम्मा ६९ हजार ३७४ मत खसेको थियो । जसमा ६८ हजार ४७२ मत सदर हुँदा ९०२ मत बदर भएको थियो ।
१६ जनाको जमानत जफत हुँदा रास्वपाका मिलन लिम्बू पनि परेका छन् । उनले ५ हजार ५० मत ल्याए ।
त्यस्तै गणेशबहादुर चौहानले ४३, जयन्तविक्रम शाहले ४३, राज बश्यालले ३८, धनराज राना मगरले ३६, श्यामबहादुर दर्जीले ३३, दिपेश बोहोराले २१, डाकप्रसाद गौतमले १४, मनोज निरौलाले १२ तथा योगेन्द्र गुरुङले ४ मत ल्याए ।
