काठमाडौँ । सभामुख देवराज घिमिरेले सिंहदरबारमा निर्माणाधीन संसद भवनको ढिलाईबारे उपप्रधान तथा सहरी विकासमन्त्री प्रकाशमान सिंह सहितका अधिकारीहरुसँग छलफल गरेका छन् ।
शुक्रबार बिहान सभामुख घिमिरेले संसद भवन निर्माणको ढिलाईबारे उपप्रधान एवं सहरी विकास मन्त्री प्रकाशमान सिंह, सचिव, भवनका महानिर्देशक र संसद भवन निर्माण आयोजना प्रमुखसहितका उच्च अधिकारीहरुसँग छलफल गरेका हुन् ।
साउन २ गते सभामुख घिमिरे निर्माणाधिन संसद भवन पुग्दा कामदारको संख्या न्यून रहेको र तीन सिफ्टमा काम गर्ने सम्झौता रहेकोमा एक सिफ्टमा मात्र काम भैरहेको पाएपछि उनले छलफल गरेको सभामुखको सचिवालयले जानकारी दिएको हो ।
अहिलेसम्म संसद भवनको ८२ प्रतिशत निर्माण प्रगति भनिए पनि निर्माण भएको संरचनाले त्यस्तो पुष्टि गर्न नसकेको सभामुखको सचिवालयले जानकारी दिएको छ ।
यो भवन २०७९ को निर्वाचनपछि सिधै सोही भवनबाट संसद सञ्चालन गर्ने योजना बनाइएको भए पनि त्यसको एक वर्षपछि जसरी पनि सर्ने बताइएको थियो । तर अहिलेसम्म अझै १८ प्रतिशत काम बाँकी रहेको बताइएको छ ।