प्राकृतिक विपदमा परी मृत्यु हुनेको सङ्ख्या एक सय २८ पुग्यो, एक सय ४३ घाइते
हाम्रा कुरा
प्रकाशित २०८१ साउन ५ शनिबार
326
Shares
तस्बिर – काठमाडौँको पशुपतिनाथ मन्दिर परिसरमा रहेको बागमती नदीमा शनिबार साँझ परेको वर्षाले आएको बाढी, रासस ।
काठमाडौँ । यो वर्षको मनसुन अवधिमा विपत्तिमा परेर शनिबारसम्म एक सय २८ जनाको मृत्यु भएको छ । प्रहरी प्रधान कार्यालयका अनुसार मनसुन शुरु भएको दिन गत जेठ २८ गतेदेखि अहिलेसम्म ४२ दिनको अवधिमा अविरल वर्षाका कारण देशका विभिन्न स्थानमा आएको बाढी, पहिरोलगायत विपद्परी एक सय २८ जनाको मृत्यु र एक सय ४३ जना घाइते भएका छन् ।
प्रहरी प्रवक्ता प्रहरी नायब महानिरीक्षक दानबहादुर कार्कीका अनुसार बाढी, पहिरोलगायत विपद्मा परी काठमाडौँ उपत्यकामा दुई, कोशी प्रदेशमा २२, मधेस प्रदेशमा पाँच, बागमती प्रदेशमा २२, गण्डकी प्रदेशमा ३८, लुम्बिनी प्रदेशमा २३, कर्णाली प्रदेशमा सात र सुदूरपश्चिम प्रदेशमा नौजनाको ज्यान गएको छ ।
बाढीका कारण जम्मा एक सय ८२ घर डुबानमा परेका तथा दुई सय २८ वटा घर, ८३ वटा गोठ, ४३ वटा पुल, एक विद्यालय र दुईवटा सरकारी कार्यालयमा क्षति पुगेको छ ।
विपद्मा परी पाँच सय ८९ वटा पशुचौपाया मारिएका छन् । उक्त अवधिमा विपद्का घटनाबाट तीन हजार सात सय ७९ घरपरिवार विस्थापित भएका छन् ।
