काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने सहकारी प्रकरणमा पक्राउ पर्ने भएपछि पार्टी केन्द्रीय कार्यालयमा आकस्मिक छलफल भएको छ । कार्यालयभित्र उपत्यकामा उपलब्ध रास्वपाका नेताहरुको छलफल चलिरहँदा बाहिर भने भोक प्यास नभनी कार्यकर्ताहरुको भीड भएको छ ।
सहकारी ठगी प्रकरणमा संसदीय छानबिन समितिले कारबाही सिफारिस गरेका गोर्खा मिडिया प्रालिका सञ्चालक पूर्वडीआईजी छविलाल जोशी आइतबार दिउँसो पक्राउ परेपछि उक्त पार्टीका नेता–कार्यकर्ताहरू वनस्थलीस्थित रास्वपा कार्यालयमा भेला भएका हुन् ।
जोशीलाई पोखरा लगिएको छ भने सोमबार जिल्ला अदालतमा पेश गरिने भएको छ । सोही प्रकरणमा गोरखा मिडियाका तत्कालीन प्रबन्ध निर्देशक तथा रास्वपा सभापति रवि लामिछाने आफू पनि पक्राउ पर्ने सूचना प्रहरीबाट पाएपछि पार्टी कार्यालयमै नेताहरूसँग आन्तरिक छलफलमा रहेका हुन् ।
रास्वपा कार्यालयमा सादा पोशाकका प्रहरीहरुसमेत उपस्थित भएको जनाइएको छ । लामिछानेले आफू पक्राउ पर्ने जानकारी पाए लगत्तै नेता कार्यकर्ताहरुलाई पार्टी कार्यालयमा भेला हुन सर्कुलर जारी गरिएको थियो ।
