सहकारी ठगीमा जोडिएका पूर्वडीआईजी जोशी थप सात दिन हिरासतमै रहने
हाम्रा कुरा
प्रकाशित २०८१ असोज ११ शुक्रबार
109
Shares
फाइल तस्बिर
पोखरा । पोखरास्थित सूर्यदर्शन बचत तथा ऋण सहकारी संस्थाको रकम दुरुपयोग गरेको आरोपमा पक्राउ परेका पूर्वडीआइजी छविलाल जोशी थप सात दिन हिरासतमै रहने भएका छन् ।
जिल्ला अदालत कास्कीले आज जोशीलाई थप सात दिन हिरासतमा राखेर अनुसन्धान गर्न अनुमति दिएको जिल्ला प्रहरी कार्यालय कास्कीले जनाएको छ ।
मुलुक बाहिर जान लागेको सूचनाका आधारमा अदालतबाटै पक्राउ पुर्जी लिएर जोशीलाई आइतबार काठमाडौँबाट पक्राउ गरिएको थियो ।
उनको सरकारी वकिलको कार्यालयमा बयान लिनेक्रम जारी छ ।
जोशीलाई सुरूमा पाँच दिन हिरासतमा राखेर अनुसन्धान गर्न अदालतले अनुमति दिएको थियो । तर अनुसन्धान नसकिएपछि शुक्रबार सात दिन म्याद थप गरिएको हो ।
गृहमन्त्री रमेश लेखकको निर्देशनपछि प्रहरीले जोशी माथि अनुसन्धान प्रक्रिया अघि बढाएको थियो ।
संसदीय छानबिन विशेष समितिले सहकारी बचत ठगीमा गोर्खा मिडियाका तत्कालीन सञ्चालक जोशीसहितलाई कारबाही गर्न सिफारिस गरेको थियो ।
