‘हामी जोगियौँ तर सबै गुमायौँ अब कसरी उठ्ने हो थाहा छैन’ [फोटोफिचर]
बाढीले खण्डहर रोशी खोला किनार बस्ती, २० को मृत्यु, हजार घर क्षतिग्रस्त, सरकार खोज्दै पीडित
हाम्रा कुरा
प्रकाशित २०८१ असोज १६ बुधबार
396
Shares
काभ्रे । काभ्रेपलाञ्चोकको पनौती नगरपालिकाको वडा नं १२ स्थित रोशी खोलाको किनारमा रहेको भूमेडाँडा बस्ती अहिले खण्डहर बनेको छ । त्यहाँका अधिकांश घरहरु बगरमा परिणत भएका छन् भने बाँकी घरहरु पनि बस्न नमिल्ने अवस्था मा छन् ।
बाढीले किसानले खेतबारीमा लगाएका अन्नबाली, त्यस खोला छेउँमा रहेका घर, स्कूल टिपर, डोजरसम्म बगाएर लागेको छ । अधिकांश स्थानीयको उस्तै आवाज छ ‘हामी जोगियौँ तर सबै गुमायौँ अब कसरी उठ्ने हो थाहा छैन ।’
विपद् गएको आज ६ दिन बितिसक्दासमेत राज्य संयन्त्र नपुगेको स्थानीयको गुनासो छ । गत बिहीबारदेखिको परेको अविरल वर्षाका कारण शनिबार रोशी खोलामा आएको भीषण बाढीले पूरै गाउँ नै बगाएको छ ।
रोशी खोलामा आएको बढीले त्यो क्षेत्रदेखि पनौती बजारसम्म असर गरेको छ ।
पनौती नगरपालिकाका अनुसार हालसम्म पनौती नगरपालिका क्षेत्रभित्र २० जना व्यक्तिहरूको निधन भएको छ । हजार भन्दा बढी घर पहिरोमा परी क्षतिग्रस्त भएका छन् भने कति सम्पति क्षति भयो भन्ने आँकडासम्म गर्न नसकिएको नगरपालिकाले उल्लेख गरेको छ ।
