पोखरा । सहकारी ठगी र संगठित अपराधमा अनुसन्धानका लागि पक्राउ परेका पूर्वउपप्रधान तथा गृहमन्त्री एवं राष्ट्रिय स्वतन्त्र पार्टी (रास्वपा) का सभापति रवि लामिछानेलाई कास्की जिल्ला अदालतमा उपस्थित गराइँदै छ ।
जिल्ला प्रहरी कार्यालय कास्कीले म्याद थपका लागि उनलाई अदालतमा उपस्थित गराउन लागेको हो । लामिछानेको म्याद थपका लागि न्यायाधीश नवराज दाहालको इजलासमा पेसी तोकिएको छ ।
यसअघि पक्राउ परेका पूर्व डीआईजी छविलाल जोशीसँगै जोडेर रवि लामिछानेलाई अगाडि बढाउने प्रहरीको योजना छ । जोशीको बयान सकिएको छ । उनी असोज ६ गतेदेखि नै जेलमा छन् ।
प्रहरीको केन्द्रीय अनुसन्धान ब्युरो (सीआईबी) ले शुक्रबार काठमाडौँबाट लामिछानेलाई पक्राउ गरेर शनिबार बिहान पोखरा ल्याएको थियो ।
पोखराको सूर्यदर्शन सहकारीको बचत हिनामिनामा संलग्न रहेको आरोपमा हालसम्म ६० जनालाई प्रतिवादी बनाइएको छ । त्यसमध्ये ७ जनालाई अदालतबाट अनुमति लिएर र २ जनालाई जरुरी पक्राउ पुर्जी दिएर नियन्त्रणमा लिइएको थियो ।
जोशी र लामिछाने गोर्खा मिडिया नेटवर्कमा सहकारीको रकम लगेर दुरुपयोग गरेको आरोपमा पक्राउ परेका हुन् ।
