केएमसीमा निःशुल्क शल्यक्रिया गर्न आए सर्लाहीबाट बिरामीहरु [भिडियो]

हाम्रा कुरा

प्रकाशित २०८१ कार्तिक ५ सोमबार

काठमाडौँ । नेपाली कांग्रेसका सांसद डा. सुनीलकुमार शर्माको काठमाडौँ मेडिकल कलेज पब्लिक लिमिटेड (केएमसी) मा निःशुल्क शल्यक्रिया गर्नका लागि सर्लाहीको तीन ठाउँबाट बिरामीहरु आएका छन् ।

केएमसीका प्रबन्धक एवं प्रमुख प्रशासकीय अधिकृत नारायणप्रसाद दाहालका अनुसार सोमबार २० जना बिरामी आइपुगेको र आउने क्रम जारी रहेको छ ।

उनीहरुको शल्यक्रिया सबै निःशुल्क हुने उनले बताए । औषधि भने बिरामीले किन्नुपर्ने उनले बताए ।

केही समयअघि केएमसीको टोलीले सर्लाहीका विभिन्न पाँच स्थानमा निःशुल्क स्वास्थ्य परीक्षण गरेको थियो । सो क्रममा शल्यक्रिया गर्नुपर्ने भनी रेफर गरिएका बिरामीहरु अहिले आएका हुन् ।

अहिले आएका बिरामीहरु हिरापुर बलरा र कौडिन्या गरी तीन ठाउँका मात्र हुन् ।

त्यसैगरी सप्तरीबाट पनि शल्यक्रियाका लागि बिरामीहरु आउनका लागि समय दिइसकेको दाहालले जानकारी दिए । सप्तरीबाट आउनेलाई अस्पताल सेवा सबै निःशुल्क हुनेछ ।

डा. शर्माले सम्हालेपछि केएमसी र नोबेलले सेवा सुविधा थपेको छ भने सामाजिक उत्तरदायित्व अन्तर्गत देशका विभिन्न भागमा पुगेर निरन्तर निःशुल्क स्वास्थ्य शिविर गर्दै आएको छ भने शल्यक्रिया पनि निःशुल्क गर्दै आएको छ ।