यमु निरौला हत्या प्रकरणमा प्रहरीको भूमिकामाथि नै शंका

युवराज रेग्मी,

प्रकाशित २०८१ कार्तिक १० शनिबार

दमक । झापाको दमक ९ का यमु निरौलाको हत्या प्रकरणमा जोडिएका सबैलाई राजनीतिक दबाब र प्रभावमुक्त भएर कारबाहीको दायरामा ल्याउन माग गर्दै शनिबार बिहानदेखि विरोध प्रदर्शन भयो ।

निरौला हत्यामा सम्लग्न मुख्य आरोपीहरुलाई पक्राउ गर्न प्रहरीले आनाकानी गर्दा पाँचौँ दिनसम्म पनि पीडित पक्षले निरन्तर प्रदर्शन गरिरहेका हुन् ।

पीडित पक्षले इलाका प्रहरी कार्यालय दमक अगाडि हत्यारालाई कारबाही गर, मान्छे मार्न पाइँदैन, यस्तो डीएसपी चाहिँदैन जस्ता चर्का नारा लगाएका छ्न् ।

प्रदर्शनकारीहरुले इलाका प्रहरी कार्यालय दमकको गेट अगाडि नै टायर बालेर प्रदर्शन गरेका छ्न् । कार्यालयभित्र डीएसपी निशान थापाले दमक नगर प्रमुख राम थापा, उपप्रमुख रेगिना भट्टराई, वडाध्यक्षहरु भीम पौडेल लगायतसँग प्रहरी अनुसन्धानमा भइरहेको प्रगति बारेमा जानकारी गराएका बताइएको छ ।

डीएसपी थापासँगको छलफलबीच बाहिर निस्किएका वडाध्यक्ष पौडेलले प्रहरी अनुसन्धानलाई दबाब र प्रभावमुक्त भएर अघि बढाउन सुझाइएको जानकारी दिए ।

सो प्रकरणमा जोडिएका दमकका बुद्धिमान थापा र नम चेम्जोङको नाम किटानी जाहेरीबाट हटाउनुपर्ने मृतक निरौला परिवारलाई दबाब दिएका कारण प्रहरीको भूमिकामाथि आशङ्का बढिरहेको छ ।

मृतकका दाजु नवराजले भाइको हड्डी मात्रै उठाउने तर हत्यारा नसमातेसम्म शव नबुझ्ने अडान लिइरहेका छ्न् ।