प्यूठान । निर्माण सुरु भएको आठ वर्षपछि प्यूठानको दम्ती सब-स्टेसन सञ्चालनमा आएको छ । सांसद सूर्यबहादुर थापाले सब-स्टेसनको उद्घाटन गरेका हुन् ।
विसं २०७२ देखि निर्माण सुरु गरेर अलपत्र छाडिएको सब-स्टेसन सञ्चालनमा आएको हो । नेपाल विद्युत् प्राधिकरण प्यूठान वितरण केन्द्रद्वारा आयोजित सब-स्टेसन सञ्चालन कार्यक्रममा सांसद थापाले सब-स्टेसन सञ्चालनले जिल्लाभित्रको विद्युत् अनियमित हुने समस्या हट्ने विश्वास व्यक्त गरे ।
सबैको तदारुकता र सहकार्यले अलपत्र अवस्थामा रहेको सब-स्टेसन छोटो समयमै सञ्चालन भएको भन्दै सांसद थापाले विकास निर्माणका लागि बजेट सुनिश्चितता जस्तै कार्यान्वयनको पाटो महत्त्वपूर्ण हुने बताए ।
उनले मङ्सिरभरिमा नौवाहिनीको वडा नं १ र गौमुखी गाउँपालिका-३ रजवाराको आधा भागमा विद्युतीकरण नभएकाले विद्युतीकरण गर्नु आफूसहित सबैको पहिलो प्राथमिकता रहनुपर्नेमा जोड दिए ।
नेपाल विद्युत् प्राधिकरण प्यूठान वितरण केन्द्र प्रमुख महेन्द्रकुमार दासका अनुसार सब-स्टेसन सञ्चालनमा आएसँगै विद्युत् वितरण र विद्युतीय जोखिमले हुने क्षति न्यूनीकरण गर्न मद्दत पुग्नेछ ।
सब-स्टेसनको निर्माण २०७२ असार ४ गते आरके विश्वनाथ जेभीले रु. सात करोड ४२ लाख ६७ हजार दुई सय ३९ मा सब-स्टेसन निर्माणका लागि ठेक्का सम्झौता गरेर काम गरेको थियो ।
लाइन तान्नका लागि श्री त्रिपुरेश्वर जय दुर्गे जेभीले रु. पाँच करोड ३६ लाख ६० हजार ६ सय ८२ मा २०७४ जेठ १७ गते ठेक्का सम्झौता गरेको थियो ।
काम सुरु गर्ने हराउने, नियामक निकायले सक्रियता देखाउँदा काम गरेजस्तो गर्ने हुँदा ९० प्रतिशत काम सम्पन्न गरी ठेकेदार कम्पनी सम्पर्कविहीन भएको वितरण केन्द्र प्रमुख दासले बताए । रासस
