पोखरा । सहकारी ठगी, सङ्गठित अपराध तथा सम्पत्ति शुद्धीकरणको मुद्दामा पक्राउ परेका राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछानेलाई आज कास्की जिल्ला अदालतमा लगिँदै छ ।

जिल्ला प्रहरी कार्यालय कास्कीको हिरासतमा रहेका उनलाई कास्की जिल्ला अदालतमा म्याद थपका लागि लगिने भएको हो । उनको हिरासतमा बस्ने म्याद गत १४ गते बुधबार नै सकिएको थियो । तिहारको सार्वजनिक बिदाका कारण उनको म्याद थप हुन सकेको छैन ।

उनको थप सात दिन म्याद थप हुन सक्ने सम्भावना छ । उनलाई अदालत लैजाने समय यकिन नभएको अनुसन्धान अधिकृत, कास्की प्रहरीका सूचना अधिकारी डीएसपी वसन्तकुमार शर्माले जानकारी दिए । 

शर्माका अनुसार रविसँगै सहकारी प्रकरणमा मुछिएका छविलाल जोशी र लिला पछाइलाई पनि आज अदालत उपस्थित गराइँदैछ । सरकारी वकिलको कार्यालयले लामिछानेसँग बयान लिने काम सकिसकेको छ । बयान सकिए पनि अनुसन्धान भने जारी छ ।

सहकारी ठगी र सङ्गठित अपराध मुद्दामा पक्राउ परेका लामिछानेमाथि सम्पत्ति शुद्धीकरणमा पनि अनुसन्धान भइरहेको डीएसपी शर्माले जानकारी दिए ।

कार्तिक २ गते शुक्रबार काठमाडौँबाट पक्राउ परेका लामिछानेलाई शनिबार ३ गते बिहान कास्की ल्याइएको थियो । ४ गते छ दिन र त्यसपछि कार्तिक ८ गते कास्की जिल्ला अदालतले साथ दिन म्याद थप गरेर प्रहरीलाई अनुसन्धान गर्न अनुमति दिएको थियो ।

जिल्ला प्रहरी कार्यालय रुपन्देहीलेसमेत कास्की प्रहरीलाई पत्र पठाएकाले उनलाई त्यसतर्फ पठाउने तयारीसमेत भइरहेको शर्माले जानकारी दिए । कार्तिक २२ गते सार्वजनिक बिदा परेकाले त्यसपछि नै रविलाई रुपन्देही पठाउने विषयमा छलफल भइरहेको शर्माको भनाइ छ ।

लामिछानेविरुद्ध बुटवलको सुप्रिम बचत तथा ऋण सहकारी संस्थाको बचत रकम हिनामिना गरेको आरोपमा रुपन्देही जिल्ला अदालतले अनुमति दिएसँगै रुपन्देही जिल्ला प्रहरी कार्यालयले पक्राउ पुर्जी जारी गरेको छ ।

रुपन्देही प्रहरीले छविलालसँग भने यसअघि नै बयान लिइसकेको छ । छविको दशैँ र तिहार प्रहरी हिरासतमै बितेको थियो । उनी असोज ६ गते पक्राउ परेका थिए । उनलाई पनि कात्तिक ८ मा चौथोपटक सात दिनको म्याद थप भएको थियो।

यस्तै सूर्यदर्शन बचत तथा ऋण सहकारीको रकम अपचलन गरेको आरोपमा कास्की प्रहरी हिरासतमै रहेकी लिला पछाईलाई पनि अदालतले कार्तिक ८ गते बिहीबार सात दिन हिरासतमा राख्न अनुमति दिएको थियो ।

रास्वपाले पोखरामा फेरि प्रदर्शन गर्ने

रास्वपाले पोखरामा फेरि प्रदर्शन गर्ने भएको छ । एक साता पोखरामा प्रदर्शन गरेका रास्वपाले आन्दोलन तुहिँदै जान थालेपछि काठमाडौँ केन्द्रित शुरु गरेको थियो । तिहार पर्वलाई मध्यनजर गर्दै सो पार्टीले आन्दोलन रोकेको थियो ।

सभापति लामिछानेलाई आज अदालत लैजाने भएपछि पोखरामा रास्वपाले प्रदर्शन गर्न लागेको हो । मंगलबार बिहान १०ः३० बजे पोखराको जिरोकिमीस्थित घण्टीघरबाट प्रदर्शन शुरु हुने सो पार्टीले जनाएको छ ।

रास्वपाले सभापति लामिछाने पक्राउलाई राजनीतिक प्रतिशोध भन्दै आएको छ । रविलाई पक्राउ गरेर कास्की ल्याएसँगै रास्वपाले देशभरका कार्यकर्ता पोखरा उतारेर आन्दोलन गरेको थियो ।

तर रास्वपाको आन्दोलनमा जनसहभागीता कम भएसँगै रणनीति बदल्दै आएको छ । निष्पक्ष छानबिनका लागि दबाब दिनुभन्दा रास्वपाका नेताहरु रिहाइका लागि दबाब दिन थालेपछि रास्वपाभित्रै दुई धार देखिएको छ । 

सहकारी ठगीमा प्रत्यक्ष देखिएका रविलाई बिना सर्त रिहा गर्नुपर्ने मागले हजारौँ सहकारी पीडितलाई अन्याय हुने ठानेरै दुई धार देखिएको हो । 

रुपन्देही प्रहरी पक्राउको तयारीमा

कास्की जिल्ला अदालतले रिहाइको आदेश दिना साथ जिल्ला अदालत रुपन्देहीको अनुमतिसँगै जिल्ला प्रहरी कार्यालय रुपन्देहीले पक्राउ पुर्जी जारी गरिसकेको छ । 

यता काठमाडौ जिल्ला प्रहरीले अनुसन्धान गरिरहेकाले काठमाडौँबाटसमेत पक्राउ पुर्जी जारी हुन सक्ने सम्भावना छ । 

यदि कास्की जिल्ला अदालतले अनुसन्धानका लागि समय थप गर्यो भने थपिएको समयमै रविलाई रुपन्देही लैजान सक्ने सम्भावना छ ।