छठी माताको पूजा आराधना, अस्ताउँदो सूर्यलाई अर्घ्य [फोटोफिचर]

हाम्रा कुरा

प्रकाशित २०८१ कार्तिक २२ बिहिबार

काठमाडौँ । राष्ट्रपति रामचन्द्र पौडेलले छठ पर्वका अवसरमा पशुपति क्षेत्रस्थित गुह्येश्वरीमा निर्माण गरिएको छठ घाटमा पुगी छठी माताको पूजा आराधना गरी सूर्यलाई अर्घ्य दिएका छन् ।

प्रत्येक वर्ष कार्तिक शुक्ल षष्ठीका दिन मनाइने छठ पर्वका अवसरमा राजधानीका गुह्येश्वरी र कमलपोखरीमा हुने छठ पूजामा राष्ट्राध्यक्षका रुपमा राष्ट्रपति पनि सहभागी हुने परम्परा रही आएको छ । राष्ट्रपति पौडेललाई गुह्येश्वरी छठ पूजा समितिका पदाधिकारी र सदस्यले स्वागत गरेका थिए ।

गुह्येश्वरीस्थित बागमती किनारमा करिब सात सय छठ पूजा स्थल निर्माण गरिएको छ । छठ पूजास्थललाई आकर्षक रुपमा सजाइएको छ ।

कार्तिक शुक्ल षष्ठीका अवसरमा आज अस्ताउँदो सूर्यलाई अर्घ्य दिइयो । कार्तिक शुक्ल चौथीका दिनदेखि सुरु भएको छठ पर्वको आज मुख्य दिन हो । आज निराहार व्रत बसेका बर्तालुले अस्ताउँदो सूर्यलाई अर्घ्य दिई रातभर छठ घाटमै जाग्राम बस्ने गर्छन् ।

छठको विधि भने कोजाग्रत पूर्णिमाका भोलिपल्ट अर्थात् कार्तिक कृष्ण प्रतिपदादेखि नै सुरु भएको हो । कार्तिक शुक्ल सप्तमीका अवसरमा शुक्रबार बिहान उदाउँदो सूर्यलाई अर्घ्य दिएपछि चार दिन लामो छठको व्रत विधि समापन हुन्छ ।

गुह्येश्वरी क्षेत्रमा छठ पर्व मनाउन आउने भक्तजनको घुइँचो छ । मित्रपार्क चोकदेखि नै भक्तजन गुह्येश्वरी जाने लाममा लागेका छन् । यहाँको छठ पूजाको व्यवस्थापन गुह्येश्वरी छठ पूजा समितिले गर्दै आएको छ ।

राजधानीमा विभिन्न ठाउँमा छठको पूजा भएको छ । नेपाली कांग्रेसका सभापति शेरबहादुर देउवा कुपण्डोलस्थित बागमती किनारमा पूजा गर्न गए ।

तराई भेकमा छठ मनाइने भए पनि पहाडमा त फैलिसकेको छ नै हिमालमा पनि छठ पूजा गर्ने बढेका छन् ।