हवाई भाडादर उपलब्ध गराउन मन्त्री पाण्डेको निर्देशन [भिडियो]

हाम्रा कुरा

प्रकाशित २०८१ मंसिर ६ बिहिबार

काठमाडौँ । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले अन्तर्राष्ट्रिय उडान भर्ने हवाई कम्पनीहरूलाई २४ घण्टाभित्र हवाई भाडादर उपलब्ध गराउन निर्देशन दिएका छन् । बुधबार मन्त्रालयमा एयरलाइन्स कम्पनीका प्रतिनिधिहरूसँग छलफल गर्दै मन्त्री पाण्डेले बिहीबार दिउँसो ४ बजेभित्र भाडादर उपलब्ध गराउन निर्देशन दिएका हुन् । एयरलाइसका प्रतिनिधि र क्यानबीच भएको पाँच बुँदे सम्झौता झारो टार्ने काम गर्दै अचाक्ली भाडा लिएको भन्दै मन्त्री पाण्डेले नेपाल वायुसेवा निगम र हिमालय एयरलाइन्सलाई सचेत गराए । उनले राज्य र नागरिककारप्रति एयरलाइन्सहरू दायित्वच्युत भएर झारो टार्ने काम गरिरहेको बताए ।

उनले भने, ‘नागरिकमाथि निकै ठूलो ज्यादती भयो, शोषण भयो । धूर्त व्यापारीको जस्तो काम एयरलाइन्सहरूले गर्न थाले भन्ने हामीलाई अनुभूति भएको छ । राज्यलाई घास हालेजस्तो काम गर्नुभएको रहेछ तपाईँहरूले । राज्य र नागरिककारप्रति एयरलाइन्सहरू दायित्वच्युत भएर झारो टारेको काम रहेछ । पछिल्लो समयमा कुनै पनि सुधारको काम देखिएन । आज जसरी तपाईँहरू गैर जिम्मेवार ढङ्गले प्रस्तुत हुनुभएको छ । तपाईँहरू आफैँ पनि एक चोटि बस्न आग्रह गर्दछु । कतिपयले आफ्नो एयरलाइन्सले टिकेट मूल्य कति लिएको छ भन्ने जानकारी समेत नलिएका प्रतिनिधिहरू पनि आउनुभएको छ । विदेशका एयरलाइन्सहरूको व्यवस्थापन गर्ने भएकोले आफ्नो दानापानी पनि उतैबाट चल्ने जस्तो गैर जिम्मेवार प्रस्तुतिबाट म निकै दुःखित भएको छु । यसको समीक्षाका लागि तपाईँहरू एक्ला एक्लै बस्न आगह गर्दछु । भोलि चार बजेसम्म समीक्षा गरेर भाडादर उपलब्ध गराउनुहोला ।’