काठमाडौँ । भारतीय क्रिकेटर महेन्द्र सिंह धोनीको युग सकिँदै गएको छ । खेलाडीका रुपमा उनको युग सकिन लागेको हो । 

भारतीय सफल क्रिकेट कप्तानमध्येका एक धोनीले इन्डियन प्रिमियर लिग आईपीएलमा पनि कमालको रेकर्ड राखेका छन् । 

उनले चेन्नई सुपर किंग्सलाई पाँच उपाधि दिलाएका छन् । तर यसपालि उनी र उनको टिमको प्रदर्शनले अब धोनी अर्को सिजन खेलाडीका रुपमा आउनेमा शंका छ । 

शुक्रबार रातिको खेलमा चेन्नईले सनराइजर्स हैदराबादसँग ५ विकेटले पराजित भएसँगै पाँच खेल खेल्न बाँकी छँदै प्लेअफ पुग्ने सम्भावनाबाट लगभग बाहिरिएको छ । 

घरेलु मैदानमा पहिले ब्याटिङ गर्दै चेन्नईले एक बल खेल्न बाँकी छँदै अलआउट हुँदै १५४ रन बनायो । डेवाल्ड ब्रेभिसले २५ बलमा ४२ रन बनाए । धोनीले भने १० बलमा ६ रन जोडेर आउट भए । 

हर्षल पटेलले ४ विकेट लिए । जवाफमा हैदराबादले ८ बल खेल्न बाँकी छँदै ५ विकेट गुमाएर जित निकाल्यो । ईशान किशनले ४४ तथा कामिन्दु मेन्डिसले अविजित रहँदै ३२ रन जोडे । 

यो खेलसँगै ९ खेलबाट ४ अंकसहित चेन्नई पुछारमा छ । ८ खेलबाट गुजरात टाइटान्स र दिल्ली क्यापिटल्स १२ अंकसहित शीर्ष २ मा छन् ।

९ खेलबाट १२ अंकको रोयल च्यालेन्जर्स बैंगलोर तेस्रो तथा ९ खेलबाट १० अंकको मुम्बई इन्डियन्स चौथो स्थानमा छ । 

एक खेल कम खेलेको पञ्जाब किंग्स र एक खेल बढी खेलेको लखनउ सुपर जाइन्टस समान १० अंकसहित पाँचौँ र छैटौँ स्थानमा छन् । 

साविक विजेता कोलकाता नाइट राइडर्स ८ खेलबाट ६ अंकसहित सातौँ स्थानमा छ । 

प्लेअफ सम्भावना कायम राख्न अब कोलकाताले खेल्न बाँकी सबै खेल जित्नुपर्नेछ । 

आज बेलुकी कोलकाता र पञ्जाब खेल्दैछन् । इडेन गार्डेनमा हुने खेल जित्दा कोलकाताले प्लेअफ सम्भावना जिवित राख्नेछ भने पञ्जाब जित्दा कम्तीमा चौथो स्थानमा पुग्नेछ । 

धोनीको करियर
धोनीले ९० टेष्ट खेलबाट ४ हजार ८७६ रन र एक दिवसीयबाट ३५० खेलबाट १० हजार ७७३ रन बनाएका छन् । टी–२० मा १ हजार ६१७ रन बनाएका छन् । 

विकेटकिपरसमेत रहेका उनले आईपीएलको शुरुआतदेखि नै खेलिरहेका छन् । उनले आईपीएलमा ५ हजार ३८३ रन बनाएका छन् । उनलाई सबैभन्दा सफल फिनिसरका रुपमासमेत चिनिन्छ ।