नयाँदिल्ली । भारत र पाकिस्तानले एकअर्काविरुद्ध सैन्य कारबाही गरिरहेका छन् । यसैबीच भारतीय विदेश र रक्षा मन्त्रालयले शनिबार पत्रकार सम्मेलनको आयोजना गरेको छ ।

सो क्रममा कर्नेल सोफिया कुरेशीले पाकिस्तानले जम्मू कश्मीरको उधमपुर, पञ्जाबको पठानकोट, आदमपुर र गुजरातको भुज एयरबेसमा उच्च गतिको मिसाइलले आक्रमण गरेको बताइन् । जसले गर्दा भारतलाई क्षति पुगेको उनले बताइन् । 

पाकिस्तानले अस्पताल र विद्यालयहरूलाई पनि निशाना बनाउने प्रयास गरेको उनले बताइन् । जुन भारतले विफल पारेको उनले बताइन् । ब्रह्मोस सुविधा नष्ट गरेको पाकिस्तानको दाबी गलत रहेको उनले बताइन् । भारतीय एस–४०० रक्षा प्रणाली पनि पूर्ण रूपमा सुरक्षित रहेको कुरेशीले बताइन् ।

पत्रकार सम्मेलनमा कर्णेल सोफिया कुरेशी, विङ कमाण्डर व्योमिका सिंह र विदेश सचिव विक्रम मिश्री उपस्थित थिए ।

कर्नेल सोफिया कुरेशीले पाकिस्तानी सेनाले सम्पूर्ण पश्चिमी मोर्चामा आफ्नो आक्रामक गतिविधिहरू जारी राखेको बताइन् । यसले युक्याब ड्रोन, लामो दूरीका हतियार, हल्का प्रतिरक्षा र लडाकु विमान प्रयोग गरेको पनि उनले बताइन् । भारतीय सैन्य पूर्वाधारलाई निशाना बनाइएको पनि उनले बताइन् ।

नियन्त्रण रेखामा ड्रोन घुसपैठ र भारी क्यालिबर हतियारहरूबाट गोलाबारी पनि भएको थियो । श्रीनगरदेखि धलियासम्म अन्तर्राष्ट्रिय सीमा र नियन्त्रण रेखामा २६ भन्दा बढी स्थानहरूमा हवाई घुसपैठको प्रयास गरिएको थियो ।

भारतीय सशस्त्र बलले धेरैजसो खतराहरूलाई सफलतापूर्वक निष्क्रिय पारेको उनले बताइन् । यद्यपि वायुसेना स्टेशन उधमपुर, पठानकोट, आदमपुर र भुज, भटिंडा स्टेशन उपकरण र अधिकारीहरूमा क्षति पुगेको छ।

पाकिस्तानले बिहान १ः४० बजे उच्च गतिको मिसाइल प्रयोग गरेर पञ्जाबको एयरबेस स्टेशनलाई क्षति पुर्‍याउने प्रयास गरेको भारतीय सेनाले जनाएको छ । 

कुरेशीले भनिन्, ‘निन्दनीय र अव्यवसायिक कार्यमा, श्रीनगर, अवन्तीपुर र उधमपुरमा रहेका वायुसेना अड्डाहरूमा रहेका चिकित्सा केन्द्रहरू र स्कूल परिसरहरूलाई पनि लक्षित गरियो। यसले एक पटक फेरि आफ्नो नागरिक पूर्वाधारलाई लक्षित गरेर आक्रमण गर्ने गैरजिम्मेवार प्रवृत्तिलाई उजागर गर्‍यो।’

पाकिस्तानले जानाजानी सैन्य प्रतिष्ठानहरूलाई लक्षित गरेपछि भारतीय सशस्त्र बलले द्रुत र सुनियोजित जवाफी आक्रमणहरू सुरु गरेको उनले बताइन् । उनले भनिन्, ‘हामीले प्राविधिक प्रतिष्ठानहरू, कमाण्ड र नियन्त्रण केन्द्रहरू, राडार साइटहरू र हतियार डिपोहरूलाई छनोट रूपमा लक्षित गर्यौं ।’

रफिकी, मुरिद, चकलाला, रहमियार खान, सुक्कुर र चुनियामा रहेका पाकिस्तानी सैन्य अड्डाहरूमा हवाई प्रक्षेपण गरिएका सटीक हतियार र लडाकु विमानहरूले प्रहार गरे । पसुरमा रहेको राडार साइट र सियालकोटको उड्डयन बेसलाई पनि सटीक गोलाबारुदले निशाना बनाइएको थियो।

कुरेशीले भनिन्, ‘अगाडिका क्षेत्रहरूमा पाकिस्तानी सैनिकहरूको संख्या बढ्दै गएको देखिन्छ, जुन उत्तेजक तस्बिर हो। हामी तनाव चाहँदैनौं, तर पाकिस्तानले पनि त्यस्तै गर्नुपर्छ। भारतीय सेनाको हतियारले पाकिस्तानी चौकीहरू ध्वस्त पार्यो।’