काठमाडौँ । भारत र पाकिस्तानकोे सैन्य अपरेशन महानिर्देशक (डाइरेक्टरल जनरल मिलिट्री अपरेशन्स, डीजीएमओ) बीच वार्ता भइरहेको छ । 

भारतले युद्धविरामपछि पाकिस्तान डीजीएमओसँग वार्ता गरिरहेको हो । वार्तामा अर्को कुनै देशले मध्यस्थता गरेको छैन । 

उक्त वार्ता सकिएपछि दिउँसो २ः३० बजे (भारतीय समयअनुसार) प्रेस सम्मेलन हुनेछ । 

संघर्ष विराम (युद्धविराम) जारी रहेको छ । दुवै देशले आफ्ना आफ्ना अपरेशन थालेसँगै अमेरिकी पहलमा संघर्षमा विराम लागेको थियो । 

बढी आक्रमण भएका भनिएका क्षेत्रहरु राजस्थान–पञ्जाब र जम्मू–कश्मीरको अवस्था सामान्य रहेको छ । 

सीमामा स्थिति सामान्य भएसँगै बजारमा चहलपहल बढेको छ । भारतीय हवाई फोर्सले भने अपरेशन सिन्दूर जारी रहेको बताएको छ । उसले आफुनो लक्ष्य हासिल गरेकोसमेत उल्लेख गरेको छ । 

समय आउना साथ यसको जवाफ दिने सेनाले जनाएको छ । अपरेशन सिन्दूर ७ मेमा शुरु भई १० मेसम्म चलेको थियो । 

सो क्रममा पाकिस्तानी गोलाबारीमा परी ७ जवान शहीद भएकोसमेत सेनाले जनाएको छ । ६० जना घाइते भएका छन् । यस बाहेक २७ सर्वसाधारण मारिएको पनि सेनाले जनाएको छ । 

अघि अप्रिल २२ मा एक नेपालीसहित २७ जना हिन्दूधर्मीलाई आतंकवादीले निर्मम हत्या गरेपछि ७ मेमा भारतले थालेको अपरेशन सिन्दूरबाट पाकिस्तानका सात सहरमा रहेका नौ आतंकवादीका स्थल ध्वस्त पारेको थियो । जसमा सय भन्दा बढी आतंकवादी मारिएका थिए ।  

भारतले पाकिस्तानका ४० जना सैन्य अफिसर मारिएकोसमेत उल्लेख गरेको छ । 

पाकिस्तानले १० मेमा युद्धविराम लागू भएको तीन घण्टापछि नै युद्धविराम तोडेको थियो । ड्रोन आक्रमण गरेको थियो । यद्यपि भारतीय सेनाले त्यसलाई नष्ट गरेको उल्लेख गरेको छ । 

भारतीय सेनाले सोमबार बिहान बितेको रात जम्मू–कश्मीरसहित कुनै पनि सीमामा पाकिस्तानका तर्फबाट कुनै आक्रमण नभएको जनाएको छ । 

उनले बितेको रात शान्ति रहेको उल्लेख गरेको छ । 

यसैबीच जम्मू–कश्मीरमा बारामूलाको उरी सेक्टरमा अनएक्स्प्लोइड अर्डिनेन्स (यूएक्सओ) डिफ्युज बनाउना साथ ६ गाउँमा स्थानीयलाई जान अनुमति दिइएको छ । 

अधिकारीहरुका अनुसार कमलकोट, मधान, गौहलान, सलामाबाद बिजहामा, गंगरहिल र अवाल्टामा ७ ओटा यूएक्सओ निष्क्रिय पारिएको थियो ।