काठमाडौं। अख्तियार दुरुपयोग अनुसन्धान आयोगले जेन-जी आन्दोलनका क्रममा आफ्ना कार्यालयबाट लुटिएका सामान फिर्ता गर्न आग्रह गरेको छ।
आयोगले एक सूचना जारी गर्दै इटहरी, हेटौंडा, पोखरा, र बुटवल लगायतका कार्यालयमा तोडफोड र आगजनी गरी चोरी भएका उपकरणहरू फिर्ता गर्न अनुरोध गरेको हो।
कसैले त्यस्ता सामान फेला पारेमा काठमाडौंको हकमा प्रहरी वृत्त मालिगाउँ र अन्य ठाउँको हकमा सम्बन्धित जिल्ला प्रहरी कार्यालयमा बुझाउन भनिएको छ। चोरी र लुटपाटमा संलग्न व्यक्तिहरूको पहिचान सीसीटीभी फुटेजमार्फत भइरहेको पनि आयोगले जनाएको छ।
आयोगका अनुसार, आन्दोलनकारीले चारपाङ्ग्रे र दुईपाङ्ग्रे गाडी, टीभी, कम्प्युटर, माइक्रो ओभन, विभिन्न साइजका हार्ड डिस्क, स्क्यानर, क्यामरा, आइप्याड, मोबाइल, ल्यापटप, हिटर, पङ्खालगायतका उपकरणहरू चोरी गरेका थिए।
