काठमाडौँ। गत हप्ता डेनमार्कका विमानस्थल र सैन्य अड्डामा भएका ड्रोन आक्रमणपश्चात् युरोपेली नेताहरू बुधबार सुरक्षा, रक्षा र युक्रेन युद्ध बारे छलफल गर्न कोपनहेगनमा दुई शिखर सम्मेलनका लागि भेला भएका छन्।

अज्ञात ड्रोनहरूले एक साताअघि कोपनहेगन विमानस्थलको हवाई क्षेत्र बन्द गर्न बाध्य पारेपछि हवाई यातायातमा ठूलो अवरोध आएको थियो, जसपछि डेनमार्कले विमानस्थलमा निगरानी मजबुत बनाउन उच्चस्तरीय राडार प्रणाली जडान गरेको छ। डेनमार्ककी प्रधानमन्त्री मेट्टे फ्रेडरिक्सनले यस घटनाको पछाडि कुन देश छ भन्ने निष्कर्षमा पुग्न नसके पनि रूस नै युरोपको सुरक्षामा प्रत्यक्ष खतरा बनेको बताएकी थिइन्।

यस चिन्ताबीच फ्रान्स, जर्मनी, नेदरल्यान्ड्स, स्विडेन र बेलायतले शिखर सम्मेलन अघि नै डेनमार्कमा विमान, युद्धपोत र हवाई रक्षा प्रणाली पठाइसकेका छन्। युक्रेनले पनि आफ्ना विशेषज्ञहरूलाई पठाएर नर्डिक देशहरूसँग संयुक्त अभ्यास सुरु गरेको छ, जसले रूसी ड्रोन आक्रमणविरुद्धको अनुभव बाँड्नेछ।

बुधबारको युरोपेली सङ्घ (ईयू) शिखर सम्मेलनको प्रमुख विषय रूस हुनेछ। सम्मेलनमा सन् २०३० सम्म युरोपले सम्भावित आक्रमणलाई कसरी रोक्ने भन्नेबारे छलफल गरिनेछ। अमेरिकी ध्यान एसिया र अन्य क्षेत्रमा केन्द्रित भएकाले युरोपेली नेताहरूले अब युरोपेली सुरक्षामा स्वावलम्बी हुनुपर्ने आवश्यकता बढेको बताएका छन्।

युरोपेली गुप्तचर संस्थाहरूको आकलनअनुसार, राष्ट्रपति भ्लादिमिर पुटिन नाटोको प्रतिबद्धता परीक्षण गर्न इच्छुक रहेकाले र अमेरिकी राष्ट्रपति डोनाल्ड ट्रम्पको नाटोप्रतिको अडान अस्पष्ट भएकाले रूसले आगामी तीनदेखि पाँच वर्षभित्र युरोपका अन्य क्षेत्रमा आक्रमण गर्ने सम्भावना छ। यसअघि गत सेप्टेम्बर १० मा रूसी ड्रोनहरूले पोल्यान्डको हवाई क्षेत्र उल्लङ्घन गर्दा नाटो विमानहरूले केहीलाई खसाल्न बाध्य भएका थिए। यो सन् २०२२ फेब्रुअरी २४ मा युक्रेनविरुद्ध युद्ध सुरु भएपछिको नाटो र मस्कोबीचको पहिलो प्रत्यक्ष भिडन्त थियो।

युक्रेनी राष्ट्रपति भोलोदिमर जेलेन्स्कीले भिडियो सन्देशमार्फत ईयू नेताहरूसँग सम्बोधन गर्ने कार्यक्रम छ। युक्रेनसम्बन्धी ईयू वार्तामा द्वन्द्वग्रस्त देशलाई निरन्तर सैन्य तथा आर्थिक सहयोग बारे केन्द्रित हुनेछ, साथै फ्रिज गरिएका रूसी सम्पत्तिहरू युक्रेनलाई सहयोग गर्न प्रयोग गर्ने प्रस्तावमाथि समेत छलफल हुने अपेक्षा गरिएको छ।

बुधबार साँझ बेलायतका प्रधानमन्त्री किर स्टार्मर लगायत युरोपभरिका शीर्ष नेताहरू युरोपेली राजनीतिक समुदाय (इपिसी) को रात्रिभोजमा सहभागी हुनेछन्। करिब ४० राष्ट्र वा सरकारका प्रमुखहरू उपस्थित हुने इपिसी नेताहरू बिहीबार पुनः भेला भई सुरक्षा, मानव बेचबिखन र आप्रवासनका मुद्दामा विशेष छलफल गर्नेछन्। यद्यपि, आलोचकहरूले यस फोरमलाई ठोस परिणाम दिन नसक्ने 'राजनीतिक बोल्ने पसल' मात्र भनेका छन्।