युक्रेन युद्ध तत्काल रोक्न ट्रम्पको आह्वान: 'युक्रेनको विजयमा विश्वास गर्न कठिन'
हाम्रा कुरा
प्रकाशित २०८२ कार्तिक ४ मंगलबार
2.8k
Shares
काठमाडौँ । अमेरिकी राष्ट्रपति डोनाल्ड ट्रम्पले युक्रेन–रुस युद्धको सन्दर्भमा आफ्नो पछिल्लो धारणा सार्वजनिक गर्दै दुबै पक्षलाई युद्ध तत्काल रोक्न आह्वान गरेका छन्। उनले युक्रेनको विजय सम्भव भए पनि हालको परिस्थितिमा त्यसमा विश्वास गर्न गाह्रो भइरहेको बताए।
अष्ट्रेलियाली प्रधानमन्त्री एन्थोनी अल्बानिजसँग ह्वाइट हाउसमा भएको भेटको अवसरमा ट्रम्पले यसअघि युक्रेनले गुमाएको भूभाग फिर्ता लिन सक्ने कुरामा आशावादी रहे पनि रूसी राष्ट्रपति भ्लादिमिर पुटिन र युक्रेनी राष्ट्रपति भोलोदिमिर जेलान्स्कीसँगको प्रत्यक्ष भेटपछि आफ्नो धारणा केही बदलिएको स्पष्ट पारे। उनले हालको अवस्थामा युद्ध रोकिने हो भने शान्तिपूर्ण समाधानको सम्भावना बढ्ने बताउँदै थपे, "मैले कहिल्यै युक्रेन युद्ध जित्छ नै भनेको थिइनँ, मैले भनेको थिएँ कि उनीहरू जित्न सक्छन्। तर युद्ध स्वभावतः अनिश्चित र जटिल हुन्छ।"
यता, राष्ट्रपति जेलान्स्कीले ट्रम्पसँगको भेटलाई 'सकारात्मक' बताएका छन्। यद्यपि, उनले रूसी पक्षले डोनेत्स्क र लुहान्स्क क्षेत्रहरू पूर्ण रूपमा युक्रेनसँग छोड्नुपर्ने माग दोहोर्याएको जानकारी दिए। ट्रम्पले टोमहक क्षेप्यास्त्र प्रणालीबारे भने हाललाई संयम अपनाउने सङ्केत गरेका छन्। अवस्था अझ जटिल नहोस् भन्ने उद्देश्यले यसबारे तत्काल निर्णय नलिने धारणा उनले व्यक्त गरेका हुन्।
जेलान्स्कीले पुटिनसँग हुन लागेको आगामी वार्तालाई शान्तिपूर्ण समाधानतर्फको सकारात्मक सङ्केतका रूपमा लिएको बताउँदै अमेरिकाबाट प्याट्रियट हवाई रक्षा प्रणाली प्राप्त गर्ने विषयमा पनि छलफल भइरहेको जानकारी दिए। उनले युद्ध अन्त्यका लागि सहयोग पुर्याउँछ भने राष्ट्रपति ट्रम्पको सकारात्मक सोचको कदर गर्ने बताए।
