काठमाडौँ। युक्रेन युद्ध सुरु भएको करिब चार वर्षपछि युरोपेली सङ्घ (ईयू) ले यूरोपमा सुरक्षा खतरा बढेको कारण देखाउँदै रूसी नागरिकहरूलाई दिइने मल्टिपल इन्ट्री भिसा अस्वीकार गर्ने निर्णय गरेको छ।

ईयू विदेश मामिला प्रमुख काजा कल्लासले युरोपेली भूमिमा निरन्तर ड्रोन अवरोध र तोडफोडका घटनापछि ईयूले भिसा नियमहरू कडा गर्दै लगेको बताएकी छिन्। उनले "युरोपमा आक्रमण गर्नु र स्वतन्त्र रूपमा घुम्न अपेक्षा गर्नुलाई पुष्टि गर्न गाह्रो छ" भन्ने धारणा राखेकी छिन्।

धेरै देशहरूमा ड्रोन आक्रमण र आगजनीका संदिग्ध घटनापछि ईयूमा रूसी ‘हाइब्रिड युद्ध’ को खतरा बढेको ठहर गर्दै यो प्रतिबन्धको उपाय अपनाइएको हो। ब्रसेल्सका अनुसार, अबदेखि रूसी नागरिकहरूले ईयू यात्रा गर्ने योजना बनाउँदा प्रत्येक पटक नयाँ भिसाको लागि आवेदन दिनुपर्नेछ। यसले सम्भावित सुरक्षा जोखिम कम गर्न आवेदकहरूको नजिक र बारम्बार छानबिन गर्न अनुमति दिनेछ। यद्यपि, 'स्वतन्त्र पत्रकार र मानव अधिकार रक्षकजस्ता जायज मामिलाहरूको लागि' नयाँ नियमहरूमा अपवाद हुने बताइएको छ।

रूसप्रति कडा अडान राख्ने केही देशहरूले साधारण रूसीहरूले युद्धबाट बढी प्रभाव महसुस गर्नुपर्छ भन्दै लामो समयदेखि भिसामा कडाइ गर्न जोड दिइरहेका थिए। ईयूले सन् २०२२ मा रूससँगको आफ्नो भिसा सहजीकरण सम्झौता निलम्बन गरेको थियो। ब्रसेल्सका अनुसार ईयूले रूसीहरूलाई दिएको भिसाको सङ्ख्या युद्धअघिको ४० लाखबाट सन् २०२३ पछि घटेर पाँच लाखमा सीमित भएको छ, यद्यपि फ्रान्स, स्पेन र इटाली जस्ता पर्यटक आकर्षण केन्द्रहरू अझै पनि सबैभन्दा धेरै भिसा प्रदान गर्ने देशहरू हुन्।

यता, क्रेमलिनका विपक्षीहरूले भने यो निर्णयको विरोध गरेका छन्। विपक्षी नेता युलिया नाभाल्नायाले व्यापक प्रतिबन्धहरू लगाउने निर्णय ‘गम्भीर गल्ती’ हुने बताउँदै यसले सबै रूसीहरूप्रति युरोप शत्रुतापूर्ण धारणा राख्छ भन्ने क्रेमलिनको दावीलाई बढावा दिने बताएकी छिन्। उनले ईयूलाई राष्ट्रपति भ्लादिमिर पुटिनको नजिकका अभिजात वर्गलाई लक्षित गर्न र सबै रूसी नागरिकलाई आवतजावतमा रोक नलगाउन आग्रह गरेकी छिन्।