काठमाडौँ । नेपाली कांग्रेसको केन्द्रीय समिति बैठक फेरि स्थगित भएको छ । बिहीबार दिउँसो १ बजे बस्ने गरी डाकिएको बैठक स्थगित गरिएको हो ।
बिहीबार बस्ने बैठक अब शुक्रबारलाई सारिएको कांग्रेस स्रोतले जनाएको छ । बैठकमा पार्टीको महाधिवेशन गर्नेबारे निर्णय गरिने जनाइएको छ ।
गत असोज २८ गतेदेखि निरन्तर बसेको केन्द्रीय कार्यसमिति बैठक गत मंसिर ६ गते महाधिवेशन गर्ने मिति नै नतोकी सम्पन्न भएको थियो ।
त्यसपछि कांग्रेस संस्थापनका नेताहरुले फागुन २१ गतेको चुनावपछिमात्र महाधविशेन गर्ने भनी प्रचार गरेका थिए ।
त्यसको प्रतिवाद गर्दै चुनावअघि नै महाधिवेशन गरी नयाँ नेतृत्व र नयाँ एजेन्डासहित चुनावमा जानुपर्ने भनी विशेष महाधिवेशनको माग गर्ने पक्ष सक्रिय भएको छ ।
उक्त पक्षले बुधबार मात्रै विशेष सभाको आयोजना गरी नेतृत्वलाई स्पष्ट सन्देश दिएको छ ।
गत असोज २९ गते नै ५४ प्रतिशत महाधिवेशन प्रतिनिधिले हस्ताक्षर गरी विशेष महाधिवेशन बोलाउन गरेको आग्रहलाई नेतृत्वले लत्याएपछि अहिले आन्तरिक किचलो तीव्र भइरहेको छ ।
पार्टीको विधानलाई टेकेर विशेष महाधिवेशनको माग गरिएको भए पनि संस्थापनले भने यसलाई अटेर गरेको छ ।
विधानअुनसार ४० प्रतिशत महाधिवेशन प्रतिनिधिले माग गरेमा तीन महिनाभित्र विशेष महाधिवशेन गर्नुपर्ने हुन्छ ।
पछिल्लो समय कार्यवाहक दिएर आफूले कार्यकारी अधिकार नलिने सन्देश दिएका सभापति शेरबहादुर देउवा १८ दिनको सिंगापुरको उपचार गरी फर्केपछि फेरि सक्रिय भएका छन् ।
उनले विभिन्न नेताहरुसँग छुट्टाछुट्टै छलफल गरी सकभर नियमित महाधिवेशन नै आगामी बैशाखमा गर्न खोजिरहेका छन् । संस्थापन इतरका केही नेताहरुलाईसमेत ललिपप देखाएर फकाउन उनी र उनको पक्ष लागेको पाइएको छ ।
तर जेन–जी आन्दोलनपछि बदलिएको परिस्थितिको आँकलन गर्दै विशेष महाधिवेशन पक्षधरले कुनै पनि हालतमा पुसभित्र नियमित वा विशेष जे भए पनि महाधिवेशन गरी नयाँ नेतृत्वसहित चुनावमा जाने अडान छाडेको छैन ।
