जेन-जी आन्दोलनका सहिद परिवारको प्रधानमन्त्री कार्कीसँग यस्तो माग
भ्रष्टाचारविरुद्ध कारबाही र १४ बुँदे माग कार्यान्वयनमा जोड
हाम्रा कुरा
प्रकाशित २०८२ मंसिर १५ सोमबार
682
Shares
काठमाडौँ। प्रधानमन्त्री सुशीला कार्कीले जेन-जी आन्दोलनमा सहादतप्राप्त सहिदका परिवारसँग सिंहदरबारमा छलफल गरेकी छन्।
सहिदका परिवारका तर्फबाट भोजविक्रम थापाको नेतृत्वमा आएको प्रतिनिधिमण्डलले सिंहदरबारमा भएको छलफलका क्रममा सरकारले आन्दोलनको म्यान्डेटअनुरुप के कति काम भयो भनेर जिज्ञासा राखेको थियो।
प्रतिनिधिमण्डलले चुनावको मात्र कुरा नगरी भ्रष्टाचारविरुद्धको कारबाही र आन्दोलनमा दमन गर्नेहरूलाई तत्काल पक्राउ गर्नुपर्ने धारणा पनि राखेको थियो। यस्तै, यसअघि सरकारसमक्ष राखेका १४ बुँदे माग तत्काल कार्यान्वयन हुनुपर्ने, अन्यथा पुनः आन्दोलनमा जान सक्ने चेतावनी पनि सहिद परिवारले दिएका छन्।
छलफलमा युवा तथा खेलकुदमन्त्री बब्लु गुप्ता र नेपाल सरकारका मुख्य सचिव सुमनराज अर्याल लगायतको पनि उपस्थिति थियो। प्रधानमन्त्री कार्की र मन्त्री गुप्ताले आन्दोलनको म्यान्डेट र सहिद परिवारका मागप्रति सरकार गम्भीर र इमानदार रहेको बताए।
