रूद्रकली र खगेन्द्रप्रसादलाई सौराहाबाट बिदाइ [भिडियो]
हाम्रा कुरा
प्रकाशित २०८२ मंसिर २९ सोमबार
750
Shares
चितवन । नेपाल सरकारले कतारलाई उपहार दिन लागेका दुई वटा हात्तीको चितवनस्थित सौराहामा सोमबार एक कार्यक्रमका साथ विदाई गरिएको छ। उपहार पठाइएका ती हात्तीहरूको नाम रूद्रकली र खगेन्द्रप्रसाद रहेको छ।
हात्तीहरूलाई वैदिक विधिअनुसार पूजा गरेर फूलमाला लगाई फलफूल खुवाएर बिदाइ गरिएको थियो। चितवनका प्रमुख जिल्ला अधिकारी गणेश अर्याल, चितवन राष्ट्रिय निकुञ्जका प्रमुख संरक्षण अधिकृत डा. गणेश पन्त लगायतले हात्तीलाई माला लगाइदिएका थिए।
२०८१ वैशाख ११ र १२ गते कतारका अमिर शेख तमिम बिन हमाद अल थानीको नेपाल भ्रमण क्रममा सरकारले एक जोडी हात्ती कतारलाई उपहार दिने निर्णय गरेको थियो।
सोहीअनुसार हात्ती प्रजनन् तथा तालिम केन्द्र खोरसोरमा हुर्किएर तालिम पाएका सात वर्षकी रूद्रकली र ६ वर्षको खगेन्द्रप्रसाद लाई उपहार स्वरुप कतार पठाउन लागिएको निकुञ्जका प्रमुख संरक्षण अधिकृत डा. पन्तले जानकारी दिए।
विदाई गरिएका हात्तीहरूलाई पुस २ गते भैरहवा विमानस्थलबाट पशु सेवा प्राविधिक र दुई जना माउतेहरू सहित चार्टर्ड विमानमार्फत कतार पठाइने तयारी रहेको छ। औपचारिक रुपमा भैरहवा विमानस्थलबाट नै कतार सरकारलाई हात्ती हस्तान्तरण गरिने डा. पन्तले बताए।
नेपालले पहिलो पटक अन्य देशलाई हात्ती उपहार दिन लागेको हो। कतारले चार्टर विमानमार्फत खोरसहित हात्तीहरूलाई कतार लैजानेछ। रूद्रकलीका माउते बुद्धिलाल श्रेष्ठ र खगेन्द्रप्रसादका माउते पाचुखा थारू पनि कतार जाँदैछन्। उनीहरूले त्यहाँ एक महिना बसेर हात्तीको स्याहार र त्यहाँका कर्मचारीलाई तालिम दिने डा. पन्तले जानकारी दिए।
