काठमाडौँ ।  युक्रेनी राष्ट्रपति भोलोदिमिर जेलेन्स्कीले रुसी आक्रमण अन्त्यका लागि अमेरिकी नेतृत्वमा तयार पारिएको मस्यौदा योजनाको पछिल्लो संस्करणबाट युक्रेनलाई केही राहत मिल्ने सङ्केत देखिएको बताएका छन्। 

अमेरिका र युक्रेनी वार्ताकारहरूले सहमति जुटाएको २० बुँदे यस योजनालाई अहिले मस्कोले समीक्षा गरिरहेको भए पनि क्रेमलिनले पूर्वी युक्रेनबाट पूर्ण फिर्तीको आफ्नो अडान छोड्ने सम्भावना भने न्यून देखिएको छ। जेलेन्स्कीले कागजातका सबै बुँदा आफूलाई मन नपरेको स्वीकार गरे पनि किएभले युक्रेनी सेनालाई डोनेट्स्क क्षेत्रबाट पूर्ण रूपमा फिर्ता लैजानुपर्ने र मस्कोद्वारा कब्जा गरिएको भूमिलाई रुसी भूभागको रूपमा मान्यता दिनुपर्ने जस्ता कडा बुँदाहरू हटाउन सफल भएको उनले जानकारी दिए।

यस नयाँ योजनामा युक्रेनले नेटो सदस्यताको माग त्याग्नुपर्ने रुसी सर्तलाई पनि समावेश गरिएको छैन। यद्यपि यस प्रस्तावले युक्रेनले केही सेनाहरू फिर्ता गर्ने र उसले नियन्त्रण गरेको डोनेट्स्कको २० प्रतिशत क्षेत्रमा असैन्यीकृत क्षेत्र स्थापना गर्ने मार्ग भने प्रशस्त गरेको छ। 

पत्रकारहरूसँगको दुई घण्टा लामो ब्रिफिङमा जेलेन्स्कीले डोनेट्स्क, लुगान्स्क, जापोरिज्जिया र खेरसोन क्षेत्रमा हाल सेना तैनाथ रहेको लाइनलाई नै वास्तविक सम्पर्क रेखाको रूपमा मान्यता दिइएको स्पष्ट पारे। उनले द्वन्द्व अन्त्यका लागि आवश्यक बलको पुनः तैनाथी र भविष्यका सम्भावित विशेष आर्थिक क्षेत्रहरूको मापदण्ड निर्धारण गर्न एउटा कार्यदल बनाइने र त्यसैको बैठकबाट अन्तिम निर्णय हुने समेत बताए।

अमेरिकी राष्ट्रपति डोनाल्ड ट्रम्पले सन् २०२२ देखि जारी यस युद्धलाई अन्त्य गर्न मस्को र किएभ दुवै पक्षलाई तीव्र दबाब दिइरहेका छन्। चार वर्षदेखि जारी यस युद्धका कारण दशौँ हजारको ज्यान गइसकेको छ भने पूर्वी युक्रेन पूर्ण रूपमा ध्वस्त भएको छ। रुसी सेनाले हाल युद्धमोर्चामा अघि बढ्दै युक्रेनी सहर र ऊर्जा ग्रिडहरूमा निरन्तर आक्रमण गरिरहेको छ। 

रुसले सन् २०१४ मा कब्जा गरेको क्रिमियाका अतिरिक्त अहिले डोनेट्स्क, खेरसोन, लुगान्स्क र जापोरिज्जियाका ठुला भूभागहरू आफ्नो नियन्त्रणमा राखेको छ। युक्रेनी पक्षको बुझाइमा रुसी राष्ट्रपति भ्लादिमिर पुटिनले अझै पनि सम्झौताका लागि कुनै रुचि देखाएका छैनन् र उनले युक्रेनी आत्मसमर्पण सरहका राजनीतिक सर्तहरूमा आफ्नो अडानलाई थप कडा बनाउँदै लगेका छन्।