काठमाडौँ । राष्ट्रिय प्रजातन्त्र पार्टी (राप्रपा) ले आगामी निर्वाचनको रणनीति र उम्मेदवार चयनका विषयमा छलफल गर्न केन्द्रीय कार्यसम्पादन समितिको बैठक आह्वान गरेको छ। पार्टीका प्रवक्ता एवं प्रचार विभाग प्रमुख मोहनकुमार श्रेष्ठका अनुसार यो बैठक भोलि, पुस १४ गते काठमाडौँको धुम्बाराहीस्थित केन्द्रीय कार्यालयमा बस्नेछ।
निर्वाचन आयोगले समानुपातिकतर्फको बन्द सूची बुझाउने कार्यतालिका सार्वजनिक गरेसँगै राप्रपाले आफ्ना उम्मेदवारहरूको नामावलीलाई अन्तिम रूप दिन यो बैठक बोलाएको हो। बैठकमा मुख्य गरी निर्वाचनको पूर्ण तयारी, समानुपातिक उम्मेदवारहरूको सूचीमा समावेश गरिने नामहरू र मुलुकको पछिल्लो समसामयिक राजनीतिक परिस्थितिबारे घनीभूत छलफल हुने प्रवक्ता श्रेष्ठले जानकारी दिए।
पछिल्लो समय वैकल्पिक राजनीतिक शक्तिहरूबीच भइरहेको ध्रुवीकरण र निर्वाचनको बढ्दो सरगर्मीका बीच बस्न लागेको राप्रपाको यो बैठकलाई निकै चासोका साथ हेरिएको छ। पार्टीले आफ्ना मुद्दाहरू र निर्वाचनमा अपनाउने कार्यदिशाबारे पनि बैठकमा महत्त्वपूर्ण निर्णयहरू गर्ने अपेक्षा गरिएको छ।
