शीतलहरबाट बालबालिका जोगाउन स्थानीय तहका विद्यालयमा 'जाडो बिदा'
१५ वटै स्थानीय तहद्वारा विद्यालयमा बिदा घोषणा
हाम्रा कुरा
प्रकाशित २०८२ पुष १४ सोमबार
795
Shares
महोत्तरी । पुसको पहिलो सातादेखि नै सुरु भएको शीतलहरले महोत्तरीको जनजीवन प्रभावित पारेपछि जिल्लाका सबै स्थानीय तहले विद्यालयमा बिदा दिने निर्णय गरेका छन्। पछिल्लो पटक बर्दिबास, जलेश्वर, मटिहानी, लोहारपट्टी र मनराशिशवा नगरपालिकाले आइतबार साँझ सूचना जारी गर्दै आजदेखि लागू हुने गरी बिदा दिएका हुन्।
मौसमको प्रतिकूलता हेरेर स्थानीय तहहरूले एक दिनदेखि पाँच दिनसम्मको बिदा घोषणा गरेका छन्। बर्दिबास नगरपालिकाले आज (सोमबार) एक दिनका लागि बिदा दिएको छ भने मङ्गलबार 'तमु ल्होसार' को सार्वजनिक बिदा रहेको छ। मटिहानी लगायतका अन्य केही नगरपालिकाले भने शुक्रबारसम्मकै लागि विद्यालय बन्द गरेका छन्। यो बिदालाई पछि बर्खे बिदाबाट मिलान गरिने नगरपालिकाहरूले जनाएका छन्।
भङ्गाहा नगरपालिकाका प्रमुख सञ्जीवकुमार साहका अनुसार स–साना बालबालिकाहरू चिसोका कारण विद्यालय आउनै छाडेपछि स्वास्थ्य सुरक्षालाई ध्यानमा राखेर यो निर्णय लिइएको हो। विगत एक सातादेखि जिल्लाभर बाक्लो हुस्सु लाग्ने र चिसो हावा चल्ने क्रम बढेको छ। चिसोका कारण विद्यालय मात्र नभई हाटबजारको चहलपहल र खेतीपातीका कामसमेत नराम्ररी प्रभावित भएका छन्।
