तस्करको निशानामा वन हेरालु, टाउको बिनाको शव फेला परेपछि खोजी कार्य तीव्र
हाम्रा कुरा
प्रकाशित २०८२ पुष २० आइतबार
779
Shares
काठमाडौँ । सर्लाहीको ईश्वरपुर नगरपालिका–२, राईटरखोरस्थित सागरनाथ वन विकास परियोजनामा कार्यरत एक वन हेरालु (चौकीदार) को बीभत्स हत्या भएको छ। ४७ वर्षीय रामइश्वर महतोको टाउको काटिएको अवस्थामा शव फेला परेपछि स्थानीय क्षेत्र शोक र त्रासले स्तब्ध बनेको छ।
घटनाको विवरण शनिबार बिहान करिब ५ बजेतिर जङ्गलमा रुख काटिएको आवाज सुनेपछि महतो त्यसको रेखदेखका लागि जङ्गलतर्फ गएका थिए। दिउँसोसम्म पनि घर नफर्किएको र मोबाइल फोन समेत ‘स्वीच अफ’ भएपछि चिन्तित बनेका परिवार र छिमेकीले खोजी गर्ने क्रममा घरदेखि करिब ५०० मिटर टाढा जङ्गलभित्र उनको शव फेला पारेका थिए।
टाउको अझै फेला परेन सर्लाही प्रहरीका अनुसार महतोको शरीर फेला परे पनि काटिएको टाउको भने अझै भेटिएको छैन। शव फेला परेको स्थान नजिकै रहेको पोखरीमा टाउको फालिएको हुन सक्ने आशङ्कामा प्रहरीले जाल हानेर खोजी गर्ने तयारी गरिरहेको छ। सर्लाही प्रहरीका सूचना अधिकारी एवं डिएसपी सरोज राईले टाउको खोजीका लागि पोखरीमा जाल हान्ने मानिसहरूको खोजी भइरहेको जानकारी दिए।
अनुसन्धान र पक्राउ प्रहरीले घटनास्थलमा धनुषाको लालगढबाट तालिम प्राप्त दुईवटा कुकुर ल्याएर अनुसन्धान सुरु गरेको छ। धारिलो हतियार प्रयोग गरी महतोको हत्या गरिएको प्रहरीको प्रारम्भिक आशङ्का छ। हत्याको आशङ्कामा प्रहरीले गाउँकै एक शंकास्पद व्यक्तिलाई नियन्त्रणमा लिएको छ, यद्यपि यसबारे आधिकारिक विवरण सार्वजनिक गरिएको छैन।
वन जोगाउन खटिएका कर्मचारीको यसरी विभत्स हत्या भएपछि सागरनाथ वन विकास परियोजनाका अन्य कर्मचारी र स्थानीय बासिन्दा त्रसित बनेका छन्। जिल्ला प्रहरी कार्यालय सर्लाहीले घटनाको गम्भीरतापूर्वक अनुसन्धान भइरहेको जनाएको छ।
