स्वतन्त्र भएका नोबेल विजेता बियालियात्स्की भन्छन्- "हाम्रो लडाइँ अझै सकिएको छैन"
लुकाशेन्कोलाई गलाउन अन्तर्राष्ट्रिय समुदायलाई अपिल
हाम्रा कुरा
प्रकाशित २०८२ पुष २४ बिहिबार
2.1k
Shares
बेलारुसी राष्ट्रपति अलेक्जेन्डर लुकाशेन्को
काठमाडौँ । बेलारुसका प्रख्यात मानवअधिकारवादी तथा सन् २०२२ का नोबेल शान्ति पुरस्कार विजेता एलेस बियालियात्स्कीले आफ्नो देशमा अझै बन्दी जीवन बिताइरहेका राजनीतिक कैदीहरूको रिहाइका लागि अन्तर्राष्ट्रिय दबाब कायम राख्नु अपरिहार्य रहेको बताएका छन्।
जेलबाट रिहा भएपछि पहिलोपटक नर्वेको नोबेल समितिसँग भेट गर्न ओस्लो पुगेका ६३ वर्षीय बियालियात्स्कीले बेलारुसी सरकार र राष्ट्रपति अलेक्जेन्डर लुकाशेन्कोमाथि निरन्तर दबाब दिइनुपर्नेमा जोड दिएका हुन्।
लामो समयको हिरासतपछि गत डिसेम्बर १३ मा मिन्स्क र वासिङ्टनबीच भएको एक सम्झौतामार्फत उनलाई रिहा गरिएको थियो, जसको बदलामा संयुक्त राज्य अमेरिकाले बेलारुसमाथिका केही आर्थिक प्रतिबन्धहरू फुकुवा गरेको थियो।
ओस्लोमा नोबेल समितिसँगको बैठकपछि एएफपीसँग कुरा गर्दै बियालियात्स्कीले राजनीतिक बन्दीहरूलाई रिहा गर्ने प्रक्रिया जारी रहनेमा आफू आशावादी रहेको व्यक्त गरे। उनले अझै पनि धेरै मानवअधिकार रक्षक, पत्रकार र अधिकारकर्मीहरू जेलमै रहेको उल्लेख गर्दै यो नै अहिलेको सबैभन्दा गम्भीर समस्या भएको औँल्याए।
मानव अधिकार अनुगमनकारी संस्था 'भियास्ना' का संस्थापक रहनुभएका बियालियात्स्कीले दशकौँदेखि बेलारुसमा हुने गरेका मानव अधिकार उल्लङ्घनका घटनाहरूको दस्तावेजीकरण गर्दै आउनुभएको छ। सन् १९९४ देखि सत्तामा रहेका राष्ट्रपति लुकाशेन्कोका प्रखर आलोचक मानिनुहुने उहाँलाई सन् २०२२ मा जेलमै रहेको अवस्थामा नोबेल शान्ति पुरस्कार घोषणा गरिएको थियो। भियास्नाका अनुसार बेलारुसमा अझै पनि एक हजार १०० भन्दा बढी राजनीतिक कैदीहरू रहेका छन्, जसको पूर्ण मुक्तिका लागि विश्व समुदायको ध्यान आकृष्ट हुनुपर्ने उहाँको भनाइ छ।
