टी–२० विश्वकपको सरगर्मी: आज तीन रोमाञ्चक खेल हुँदै, कुन टोलीको पल्ला भारी ?
हाम्रा कुरा
प्रकाशित २०८२ फागुन २ शनिबार
776
Shares
काठमाडौँ । भारतमा जारी टी–२० विश्वकप अन्तर्गत आज शनिबार तीनवटा महत्त्वपूर्ण खेलहरू हुँदैछन्। दिनको पहिलो खेलमा समूह 'बी' का आयरल्याण्ड र ओमानबीच प्रतिस्पर्धा हुनेछ।
श्रीलङ्काको कोलम्बोमा हुने यो खेल नेपाली समय अनुसार बिहान ११:१५ बजेदेखि सुरु हुँदैछ। जारी प्रतियोगितामा आयरल्याण्ड र ओमान दुवै टोलीले अहिलेसम्म खेलेका सुरुवाती दुई–दुई खेलमा हार बेहोरेका छन्, त्यसैले आजको खेल दुवैका लागि पहिलो जित दर्ता गर्ने अवसर हुनेछ।
त्यस्तै, आजको दोस्रो भिडन्त समूह 'सी' का इङ्गल्याण्ड र स्कटल्याण्डबीच हुँदैछ। भारतको कोलकातास्थित ऐतिहासिक इडेन गार्डेन्समा हुने यो खेल दिउँसो ३:१५ बजेदेखि सुरु हुनेछ।
यस विश्वकपमा इङ्गल्याण्ड र स्कटल्याण्ड दुवैको यात्रा समान देखिएको छ; उनीहरूले खेलेका दुई–दुई खेलमध्ये एकमा जित र एकमा हार बेहोरेका छन्। यस खेलको नतिजाले समूह 'सी' को अङ्क तालिकामा निकै अर्थ राख्नेछ।
आजको तेस्रो तथा अन्तिम खेलमा समूह 'डी' का दुई बलिया टोलीहरू न्युजिल्याण्ड र दक्षिण अफ्रिका भिड्दैछन्। नेपाली समय अनुसार साँझ ७:१५ बजेदेखि सुरु हुने यो खेल निकै प्रतिस्पर्धात्मक हुने अपेक्षा गरिएको छ।
न्युजिल्याण्ड र दक्षिण अफ्रिका दुवै टोलीले यसअघि खेलेका आफ्ना दुई–दुई खेलमा शानदार जित हासिल गरेका छन्। अपराजित रहेका यी दुई टोलीबीचको आजको भिडन्तले समूह 'डी' को शीर्ष स्थानको छिनाझपटीलाई थप रोचक बनाउनेछ।
