एक सय ३० क्षेत्रको नतिजा सार्वजनिक, रास्वपाले पुर्यायो सय सिट
हाम्रा कुरा
प्रकाशित २०८२ फागुन २४ आइतबार
1.2k
Shares
काठमाडौँ । प्रतिनिधि सभा सदस्य निर्वाचनको पछिल्लो परिणामअनुसार राष्ट्रिय स्वतन्त्र पार्टी (रास्वपा) ले ऐतिहासिक सफलता हासिल गर्दै जितको शतक पूरा गरेको छ। हालसम्म देशभरका १३० ओटा निर्वाचन क्षेत्रको अन्तिम नतिजा सार्वजनिक भइसक्दा रास्वपा एक्लैले १०० सिटमा विजय प्राप्त गरेको छ।
निर्वाचन आयोगको तथ्याङ्कअनुसार रास्वपाका अधिकांश उम्मेदवारहरूले आफ्ना निकटतम प्रतिस्पर्धीलाई ठूलो मतान्तरले पराजित गर्दै संसद्को यात्रा तय गरेका छन्।
रास्वपाबाहेक अन्य दलहरूको अवस्था भने निकै खुम्चिएको देखिएको छ। हालसम्म नेपाली कांग्रेसले १५ स्थानमा जित हासिल गरेको छ भने नेपाल कम्युनिस्ट पार्टी (एमाले) ७ सिटमा मात्र सीमित भएको छ। त्यसैगरी, नेपाल कम्युनिस्ट पार्टी (नेकपा) ले ५ स्थानमा जित दर्ता गर्दा श्रम संस्कृति पार्टी, राष्ट्रिय प्रजातन्त्र पार्टी (राप्रपा) र स्वतन्त्र उम्मेदवारले एक/एक निर्वाचन क्षेत्रमा विजय प्राप्त गरेका छन्।
मतगणना जारी रहेका बाँकी निर्वाचन क्षेत्रहरूमा पनि रास्वपाकै वर्चस्व देखिएको छ। अहिले २५ स्थानमा रास्वपाका उम्मेदवारहरूले अग्रता लिइरहेका छन्। अन्य दलहरूमध्ये नेकपा एमाले र नेपाली कम्युनिस्ट पार्टी ३/३ स्थानमा अगाडि छन् भने नेपाली कांग्रेस र श्रम संस्कृति पार्टी २/२ स्थानमा अग्रस्थानमा रहेका छन्। यो चुनावी परिणामले नेपाली राजनीतिमा ठूलो फेरबदलको संकेत गरेको छ।
