इजरायली प्रधानमन्त्रीको नयाँ आदेश, लेबनानमा सैन्य घेरा अझै विस्तार हुने
हाम्रा कुरा
प्रकाशित २०८२ चैत १६ सोमबार
1.8k
Shares
काठमाडौँ । इजरायली प्रधानमन्त्री बेन्जामिन नेतान्याहुले लेबनानमा जारी सैन्य कारबाहीलाई थप सशक्त बनाउन सेनालाई नयाँ निर्देशन दिएका छन्। आइतबार उत्तरी कमान्डको भ्रमणका क्रममा एक भिडियो वक्तव्य जारी गर्दै उनले लेबनानमा विद्यमान सुरक्षा क्षेत्रलाई अझ विस्तार गर्न आदेश दिएको बताए।
यस सैन्य कदमको मुख्य उद्देश्य हिजबुल्लाहका लडाकूहरूबाट हुने आक्रमणको खतरालाई निस्तेज पार्नु र इजरायली सीमा क्षेत्रमा हुने एन्टी-ट्याङ्क मिसाइल प्रहारलाई रोक्नु रहेको नेतान्याहुले स्पष्ट पारेका छन्। उनले हिजबुल्लाह समूह इजरायली सेनाको प्रहारबाट गम्भीर रूपमा थला परेको दाबी गरे पनि अझै केही मात्रामा रकेट प्रहार गर्ने 'अवशिष्ट क्षमता' बाँकी नै रहेको स्वीकार गरे।
आफ्नो सम्बोधनका क्रममा नेतान्याहुले मध्यपूर्वको शक्ति सन्तुलन बदलिएको दाबी गर्दै भने, "इरान, हिजबुल्लाह र हमास अब पहिले जस्तो रहेनन्। यी अब हाम्रो अस्तित्वलाई खतरामा पार्ने आतङ्कवादी सेना होइनन्, बरु आफ्नै अस्तित्व जोगाउन संघर्ष गरिरहेका पराजित शत्रु हुन्।" उनले इजरायल आफ्नो लक्ष्यमा दृढ रहेको र दैवी सहयोगमा विजयतर्फ उन्मुख भएको समेत बताए।
