पोखरा । नेपाल उद्योग वाणिज्य महासंघको चौथो अधिवेशनबाट गण्डकी प्रदेश अध्यक्षमा बागलुङका नरेश कँडेल निर्विरोध निर्वाचित भएका छन् ।
अध्यक्षका प्रत्यासी नवराज सुवेदीले उम्मेद्वारी फिर्ता लिएपछि कँडेल निर्विरोध निर्वाचित भएका हुन् । अन्य पदहरूमा पनि अधिकांश उम्मेदवार निर्विरोध चयन भएका छन् ।
कँडेल यसअघि बागलुङ उद्योग वाणिज्य संघ तथा नेपाल पत्रकार महासंघ बागलुङ शाखाका निवर्तमान अध्यक्षसमेत हुन् । अध्यक्ष पदमा भने सुरुआतमा दुई जनाको उम्मेदवारी परेको थियो ।
समितिको जिल्ला–नगर उपाध्यक्षमा मृगेन्द्र घिमिरे, एसोसिएट उपाध्यक्षमा सूर्यबहादुर भुजेल, वस्तुगत उपाध्यक्षमा हरिकुमार श्रेष्ठ र कोषाध्यक्षमा राजेन्द्र ओझा निर्विरोध निर्वाचित भएका छन् ।
साथै, नौ जना सदस्य पनि निर्विरोध चयन भएको निर्वाचन समितिले जनाएको छ । तीन सदस्य भने अध्यक्षले मनोनीत गर्ने व्यवस्था छ ।
महासंघले चैत मसान्तभित्र सबै प्रदेश अधिवेशन सम्पन्न गर्ने जनाएको छ ।
नवनिर्वाचित अध्यक्ष कँडेलले गण्डकी प्रदेशमा पर्यटन प्रवर्द्धनलाई प्राथमिकतामा राख्दै निजी क्षेत्रको सुदृढीकरणमा जोड दिने प्रतिबद्धता व्यक्त गरेका छन् ।
उनले वस्तुगत र एसोसिएट संस्थाहरूको क्षमता विकास गरी आर्थिक गतिविधि विस्तार गर्ने योजना समेत अघि सारेका छन् ।
