कुमारी बैङ्कद्वारा गणतन्त्र नेपालको पहिलो रियल–टाइम ईआरपी–एकीकृत डिजिटल लेन्डिङ प्लेटफर्म सार्वजनिक
हाम्रा कुरा
प्रकाशित २०८३ जेठ २९ शुक्रबार
179
Shares
काठमाडौँ। कुमारी बैङ्क लिमिटेडले नेपालमा डिजिटल बैङ्किङलाई नयाँ उचाइमा पुर्याउने उद्देश्यले आईएमएस सफ्टवेयर प्रालिको सहकार्यमा गणतन्त्र नेपालको पहिलो रियल–टाइम ईआरपी–एकीकृत डिजिटल लेन्डिङ प्लेटफर्म सार्वजनिक गरेको छ।
यो प्लेटफर्ममार्फत बैङ्कले आफ्ना व्यवसायी ग्राहकहरूलाई आईएमएस को ईआरपी सफ्टवेयरबाटै ऋण उपलब्ध गराउने छ। यसले लामो कागजी प्रक्रिया र शाखा कार्यालय जानुपर्ने झन्झट हटाउने छ।
यो प्लेटफर्मले ऋण आवेदन, स्वीकृति, वितरण र भुक्तानीसम्मको सम्पूर्ण प्रक्रिया डिजिटल माध्यमबाट सम्पन्न गर्न सहज बनाउने छ।
ईआरपी प्रणालीसँगको प्रत्यक्ष एकीकरणमार्फत बैङ्कले व्यवसायको बिक्री, कारोबार र वित्तीय तथ्याङ्कजस्ता वास्तविक समय (रियल–टाइम) डाटाका आधारमा ऋण योग्यता मूल्याङ्कन गर्न सक्नेछ । यस डाटा–आधारित प्रणालीले छिटो र सही निर्णय लिन सहयोग गर्नेछ र परम्परागत ऋण प्रक्रियाभन्दा फरक तरिकाले व्यवसायहरूलाई वित्तीय पहुँच उपलब्ध गराउनेछ।
यसअन्तर्गत ईआरपी प्रयोग गर्ने व्यवसायहरूले आफ्नो सञ्चालनका आधारमा रु. ५०,००,००० सम्मको रनिङ क्यापिटल ऋण (वर्किङ क्यापिटल लोन) प्राप्त गर्न सक्नेछन्। यो ऋण १२ महिनासम्मको समान मासिक किस्ता (ईएमआई) मार्फत तिर्न सकिने व्यवस्था गरिएको छ।
यो पहल नेपाल राष्ट्र बैङ्कको डिजिटल लेन्डिङ मार्गदर्शनअनुसार डिजिटल ऋण सेवा विस्तार र ऋण पहुँच बढाउने लक्ष्यसँग मिल्दो छ। यसले विशेष गरी साना तथा मझौला उद्यम (एसएमई) लाई फाइदा पुर्याउने विश्वास लिइएको छ।
कुमारी बैङ्कले देशभर २७ शाखा र ४१ एटिएमको नेटवर्क, बलियो बैङ्किङ अनुभव र प्राविधिक साझेदारहरूसँगको सहकार्यमार्फत नेपालमा डिजिटल वित्तीय रूपान्तरणको अग्रणी भूमिका खेल्ने प्रतिबद्धता व्यक्त गरेको छ। आगामी दिनमा पनि बैङ्कले अझ सरल, छिटो र प्रभावकारी सेवाहरू प्रदान गर्न निरन्तर प्रयास गर्ने जनाएको छ।
