स्कुटी दुर्घटनामा जीवनको गयो ज्यान

सन्जय भट्टराई,

प्रकाशित २०७७ चैत ६ शुक्रबार

कावासोती । पूर्व पश्चिम राजमार्गको नारायणघाट बुटवल सडकखण्डको कावासोती–८ खरकट्टामा स्कुटर दुर्घटना हुँदा एक जनाको ज्यान गएको छ । दुर्घटनामा कावासोती–२ का ३५ वर्षीय जीवन रानाको मृत्यु भएको जिल्ला प्रहरी कार्यालय पुर्वी नवलपरासीका डीएसपी दिलिपकुमार गिरीले जानकारी दिए ।

खरकट्टा जंगलमा लु ५८ प ७०४८ नम्बरको स्कुटर र चालक लडिरहेको भन्ने सूचनाको आधारमा घटनास्थल पुगेको प्रहरीले रानालाई राति नै उद्धार गरी उपचारको लागि मध्यविन्दु जिल्ला अस्पताल डण्डा पठाएको थियो ।

जिल्ला अस्पतालमा उपचार हुन नसकेपछि थप उपचारको लागि पुरानो मेडिकल कलेज भरतपुर पठाइएका रानालाई अस्पतालले मृत घोषणा गरेको डीएसपी गिरीले बताए ।