टिपरको ठक्करबाट दुईको मृत्यु, २५ वर्षे चालक नियन्त्रणमा

हरि पन्त,

प्रकाशित २०७८ असार ७ सोमबार

पोखरा । कास्कीमा आइतबार साँझ ५ बजे मोटरसाइकल दुर्घटना हुँदा दुई जनाको मृत्यु भएको छ । मृत्यु हुनेमा पर्वत जिल्ला मोदी गाउँपालिका वडा नं १ भुकताङ्लेका ३३ वर्षीय विनोद मल्ल र सोही ठाउँ निवासी वर्ष ४७ का भीमबहादुर मल्ल रहेका छन् ।

कास्कीको अन्नपूर्ण गाउँपालिका वडा नं ३ लक्ष्मी देउरालीस्थित पत्थर ढुंगामा उनीहरु सवार मोटरसाइकललाई टिप्परले ठक्कर दिंदा दुर्घटना भएको हो ।

पर्वतबाट पोखरा आउँदै गरेको प्र ३०१००३क ५१७३ नम्बरको टिप्परले पोखराबाट पर्वत जाँदै गररेको ग२०प ६०३० नम्बरको मोटरसाइकल ठक्कर दिएको कास्की प्रहरीले जनाएको छ ।

दुर्घटनामा गम्भीर घाइते भएका उनीहरुलाई पोखरास्थित मणिपाल शिक्षण अस्पताल ल्याइएको र तत्कालै चिकित्सकले मृत घोषणा गरेको कास्की प्रहरी प्रवक्ता एवं डिएसपी सुवास हमालले जानकारी दिए ।

घटनामा संलग्न टिप्पर चालक सिन्धुपाल्चोक ईन्द्रावती १० घर भएका २५ वर्षे सुरेश माझीलाई प्रहरी चौकी नौडाँडाबाट खटिएको प्रहरी टोलीले नियन्त्रणमा लिएको उनले बताए ।