लोकसेवाले खुलायो अधिकृत स्तरका लागि ठुलो सङ्ख्यामा विज्ञापन
निरञ्जन कुमार साह,
प्रकाशित २०७८ असार ३१ बिहिबार
1.5k
Shares
जनकपुरधाम । प्रदेश नम्बर दुईको लोक सेवा आयोगले अधिकृत स्तर (प्राविधिक अप्राविधिक) को लागि ठुलो सङ्ख्यामा विज्ञापन खुलाएको छ । लोकसेवाले खुला प्रतिस्पर्धा तथा बढुवामार्फत रिक्त पदपूर्ति गर्न प्राविधिक तथा अप्राविधिक अधिकृतको विज्ञापन गरेको हो ।
अधिकृत सातौँ तह (प्राविधिक), अधिकृत एघारौँ र नवौँ तह (प्राविधिक अप्राविधिक), अधिकृत सातौँ (प्राविधिक अप्राविधिक) पदको लागि बढुवामार्फत पदपूर्ति गर्न विज्ञापन गरिएको छ।
त्यस्तै गरी खुल्ला समावेशी र अन्तर सेवा प्रतियोगितात्मक लिखित परीक्षामार्फत पदपूर्ति गर्नका लागि अधिकृत सातौँ तह प्रशासन सेवा (अप्राविधिक), प्राविधिक तर्फ तथ्याङ्क, इन्जिनियरिङ, कृषि, वन र शिक्षा सेवाका सातौँ तहका अधिकृतको लागि विज्ञापन गरिएको छ ।
खुला प्रतिस्पर्धामार्फत पूर्ति गर्न प्राविधिकतर्फ स्वास्थ्य सेवाको अधिकृत आठौँ तह र अधिकृत सातौँ तहको लागि पनि विज्ञापन गरिएको छ। दरखास्त दिने अन्तिम म्याद साउन २० गतेसम्म र दोब्बर दस्तुर तिरी साउन २७ गतेसम्म समय रहेको छ।
